Read Khoekhoegowab Psalmdi 19 Bible Online

Psalmdi 19 - Khoekhoegowab bible

Psalmdi 19

¹ǁNaetsanas Davib dis, ǂam ǁnae-aobab ge dības. ǀHomgu ge Elob di ǃgôaba ra ǃhoa; tsî ǃāǂuisaba, ǁîb ǃomgu di sîsenna.

²Tsēs ge tsēsa ǀoasase ra mîba; tsî tsuxub ge tsuxuba ǂansa ra ǂhôaba.

³Gowa-i xare-i hâ tama, tsî mîdi xaredi hâ tama; ǁîra di dommi ge ǁnâuhe tama hâ.

⁴ǁÎra di ǀguiro-ūtsurib ge ǃhūbaib hoaragab ǃoa ra ǂoa, tsî ǁîra di mîde ǃhūbaib di ǀkhâuǀams kōse. ǁÎra ǃnâb ge soresa tentomsa ge dība.

⁵Tsîs ge ǁîsa ǃgame-aob ǁîb di ǁomǃnâ-omsa xu ra ǂoaxab khami ī, tsîs ge ǁē-aob khami ra ǃgâiaǂgao, daobas nî ǃgûse.

⁶ǀHommi di ǀamsa xus ra ǂoaxa, tsîs ge ǁîb di ǀkhâuǀamdi kōse ra ǃgû; tsî xū-i xare-i ge ǁîs di ǀgamma xu sâusa tama hâ.

⁷ǃKhūb di ǂHanub ge a dīǀoasa, tsîb ra ǀomsa ǃhobasen kai. ǃKhūb di ǀhûǀguitimîs ge a ǁaposa, tsîs ra gârena gā-aisiba mā.

⁸ǃKhūb di mîmādi ge a ǂhanu, tsî di ge ǂgaoba ra dâ kai. ǃKhūb di ǂnûiǂgās ge a ǃanu, tsîs ra mûde ǃnâǃnâ.

⁹ǃKhūb di ǃaoǃgâb ge a ǃanu, ǀamose ra hâhâǃâ. ǃKhūb di mîmādi ge a ama, ǀhûpe di ge a ǂhanu-ai.

¹⁰ǁÎn ge ǃhuniǀurib xa a ǃgomǀgausa, ā, ama ǀui ǃhuniǀurib xa; tsîn ge danib tsî ǀhûdanib xa a ǂkhon.

¹¹Sa ǃgāb on ge ǁîna xu ra ǁnamahe; ǁîna ra ǃkhōǀgaipe-i ge kai amǃnâ-e ūhâ-e.

¹²ǃÛǂamde, tari-e ǁîde a ǂan ǁkhā? ǂGanǃgâsa ǃûǂamde xu ǃanuǃanu te re!

¹³Îts sa ǃgāba ǁkhāti ǂanapega ǁorena xu ūdawa; an tita tā gaoǂam, o ta ge nî ǂhauǃnâ tsî ta ge kai ǃûǂamsa xu nî ǃnora.

¹⁴A di ǃgâise i sa ais aiǃâ ti ams di mîde, tsî ti ǂgaob di ǂâiǂâisende, ǃKhūtse, ti ǃhao tsî ti ore-aotse!