Read Khoekhoegowab Psalmdi 21 Bible Online

Psalmdi 21 - Khoekhoegowab bible

Psalmdi 21

¹ǁNaetsanas Davib dis, ǂam ǁnae-aobab ge dības. ǃKhūtse, gao-aob ge ǃgâiaǂgao hâ sa ǀgaib ǂama. Tsî matikōseb ra ǃgâiaǂgao sa huib ǂama!

²Sats ge ǁîba ǁîb ǂgaob ra tura xū-e ge mā, tsîts ge ǁîb amǁgaukha di ǂgansa ǂkhā bi tama ge i. Sela.

³Sats ge ǁîba ǃgâib di ǀkhaegu ǀkha ra aiǃhaeba xui-ao, ǁîb di danas aits ra ǀui ǃhuniǀurib ǀkha dīhe hâ kronsa ǂnûi.

⁴Ûibab ge sa tawa ge ǂgan, ots ge ǂomxa ûiba ge mā bi, hugaǀgui tsî ǀamos kōse.

⁵ǁÎb di ǃgôasib ge a kai sa huiba xu; ǂkhaisib tsî anusib tsîkhats ge ǁîb ai ge ǁgui.

⁶Sats ge ǁîba ǀkhaese ra ǂnûi ǀamos kōse xui-ao, tsîts ge ǁîba ra ǃgâiaǂgao kai, dâb ǀkha sa ais aiǃâ.

⁷Gao-aob ge ǃKhūb ai ra ǂgomaiǂnûi xui-ao; tsî Hoan xa ǀGapib di ǃgâixaǃnâsiba xub ge ǁnope tide.

⁸Sa ǃommi ge sa khākhoen hoana nîra hō; sa amǀkhāb ǁôab ge sa ǁkhanaona nîra hō;

⁹Sats ge ǁîna ǀaexa ǁganommi khami nîra dī, ǁînats ra kōǀî ǃnubai; ǃKhūb ge ǁîna ǁîb di ǁaib ǃnâ nîra hapu, tsî ǀaes ge ǁîna nîra haputoa.

¹⁰Sats ge ǁîn di ôana ǃhūbaiba xu nîra hîkākā, tsî ǁîn di suriba khoen ôana xu.

¹¹ǁÎn ga ǂkhabaxū-e sa ǃoagu ǂâi tsî taotaosa dī-en ga ǂâibaseno, on ge dī ǁkhā tide;

¹²Sats ge ǁîna nî saurubē xui-ao; sa ǂāgu ǀkhats ge ǁîn di ais ǃoa nîra ǀnēǀnē.

¹³ǀGapiǀgapisen re ǃKhūtse, sa ǀgaib ǃnâ; o da ge nî ǁnae, o da ge sa ǁkhāsiba psalmde nî ǁnaeba.