Read Khoekhoegowab Psalmdi 22 Bible Online

Psalmdi 22 - Khoekhoegowab bible

Psalmdi 22

¹ǁNaetsanas Davib dis, ǂam ǁnae-aobab ge dības, Ajelet-Hasxaxars ǃoa. Ti Elotse, ti Elotse, tare xū-i ǃaromats go ǁnāxū te? ǃNūts a ti oresa xu, ti ǃgaes di mîde xu?

²Ti Elotse, tsēa ta ra ǂgai, xawets ǃeream te tama hâ, tsuxub ǃnâ, xawe ta sâ-e hō tama hâ.

³Xawe sats ge a ǃanu; Israeli karedi ǃnâ ǁan hâtsa.

⁴Sa ai gu ge sida îga ge mûmâinǃgâ; ǂgomaiǂnûi gu geo, ots ge ǁîga ge ore.

⁵Sa ǃoa gu ge ǂgai, o gu ge ge orehe; sa ai gu ge ǂgomaiǂnûi o gu ge taotaohe tama ge i.

⁶Xawe tita ge ǂunita tsî khoe tama ta, khoen di ǃharaxūta, tsî ǁaes di ǃhōxūta.

⁷Hoan tita ra mûn ge tita ra ǃhō; amǁgauban ra ǂōnam, tsîn ǃnabindana tsî ra mî:

⁸ǁÎb ge ǁîb di ǃkhaisa ǃKhūb ai ge ǁgui; ab nēsi huiǂui bi, ab ore bi, ǁîb ǃnâb turaba ūhâ xuige.

⁹Sats ge ǁîts, tita ǁgûs di ǃnāba xu ge ǂgaeǂuitsa; tita ge ǂgomaiǂnûi kaitsa, ǁgûs di samra tawa ta hâ hîa.

¹⁰Sa ai ta ǁguihe hâ ǁgûs di sorosa xu; ǁgûs di ǃnāba xuts ge a ti Elo.

¹¹ǁNâi tā tita xu ǃnūse hâ, ǂōǂōsib a ǀgū xuige, hui-ao-i xare-i a ǀkhai xuige.

¹²ǂGui ǁgōgu ge tita ge xāǂgā; ǀgaisa ǁgōgu Basanni digu ge tita ge ǃnamiǂgā.

¹³ǁÎgu di amǃnâga gu ge tiǀî ge khowa, ǀkhauǂkhū ra tsî ǃgō ra xammi xase.

¹⁴Tita ge ǁgam-i xase ǂnâǂuihe hâ, tsî ti ǂkhōgu hoagu ge ge ǀgora; ti ǂgaob ge ǂnuruǁnui-i xase ī, ǁîb ge ti ǃnāb ǃnâ tsuni hâ.

¹⁵Ti ǀgaib ge ǂnâ hâ sūǃâro-i xase tsî ti nams ge ti namǃhanab tawa ra ǂae; tsî sats ge tita ǁōb di tsarab ǃnâ ra ǁgui.

¹⁶Arin ge tita xāǂgā hâ; ǂkhabadī-aon di ǀhao-i ge tita ǃnamiǂgā hâ, ǁîn ge ti ǃomkha tsî ti ǂaira go doroǃnam.

¹⁷Ti ǂkhōgu hoaga ta ge a ǃgôa ǁkhā; ǁîn ge ǁîsa ra mû, titan ge ra mûǃhara.

¹⁸ǁÎn ge ti sarana ǁîn ǃnâ ra ǀgora, tsî ti sarab ǂaman ra ǂnōgusa ao.

¹⁹Xawe sats, ǃKhūtse, tā ǃnūse hâ re; ti ǀgaitse, tita huis ǀkha ǃhaeǃhaesen re.

²⁰Ti ǀomsa ore re gôaba xu, ti ǃū-ai hâ ǀomsa arib di ǀgaiba xu.

²¹Ore te re xammi di amǃnâba xu; î ǁnâu-am te re ǁaixa gomagu di ǁnâga xu.

²²O ta ge sa ǀonsa ti ǃgâsaga nî ǃhoaba; o ta ge ǀhaohâb ǃnâ satsa nî kare.

²³Sadu ǃKhūba ra ǃaodo, ǁîba kare! Sadu Jakob di suridu hoado, ǁîba ǃgôa, î du ǁîba ǃao, Israeli di suridu hoado!

²⁴ǁÎb ge ǃharaxū tsî aoxū tama ge i ǁgâiǀāhe rab di ǁgâiǀāba; tsîb ge ǁîb di aisa ǁîb aiǃâ sâu tama ge i, tsîb ge ge ǁnâu, ǁnāb ge ǁîb ǃoa ǂgaio.

²⁵Sats xa ta ge nîra kare ǀhaohâb ǃnâ; tita ge ti mîmâide nîra matare, ǁîba ǃaoǃgâ hân ais aiǃâ.

²⁶ǀKhomǀkhomsaben ge ǂû tsî nîra ǁâ; ǃKhūban ge nîra kare, ǁîba ra ôana; sadu di ǂgaob ge ǀamosib kōse nîra ûi.

²⁷ǃHūbaib di ǀamdi hoadi ge ǁîs xa nîra ǂâi tsî ǃKhūba ǃoa nîra ǃhobasen, tsî ǁaedi hoadi din ge sa ais aiǃâ nîra ǀgoreǀî.

²⁸Gaosib a ǃKhūb di amaga, tsîb ge ǁaedi ǃnâ ra gaosîsen.

²⁹ǃHūbaib ai hâ kausan hoan ge ǂû tsî nîra ǀgoreǀî; hoan tsarab ǃnâ ge ǁgôan ge ǁîb di ais aiǃâ nîra ǃhonǁgoa, tsî ǁîb ûib âba ǃkhōǀgara ǁoa ge iba.

³⁰Surib ge ǁîba nîra ǃoaba; ǃKhūb xa i ge nîra ǃhoahe ǃgoaxa ǃhaodi kōse.

³¹Hā tsîn ge ǁîb di ǂhanu-aisiba nîra ǂanǂan, ǁnā ǁaes ǃnae nîsa, ǁîb go dī amaga.