Read Khoekhoegowab Psalmdi 25 Bible Online

Psalmdi 25 - Khoekhoegowab bible

Psalmdi 25

¹ǁNaetsanas Davib dis. Sa ǃoa ta ge ti ǀomsa ra ūkhâi, ǃKhūtse;

²ti Elotse, sa ai ta ge ra ǂgomaiǂnûi, î ta tā taotaohe re, în ti khākhoena tā ti ǂama dâb xa urikhâi re.

³Ā, hoan sa ai ra ǂgomaiǂnûin ge taotaohe tidena, xawen ge nîra taotaohe ǁause ra ǁnāǁgôana.

⁴ǃKhūtse, sa daoga ǂanǂan te re, îts sa ǃganga ǁkhāǁkhā te re;

⁵ǂgaeǂgui te re sa amab ǃnâ, î ǁkhāǁkhā te re, ti ǃgâiǃōsib di Elots a xuige; satsa ta ge hoaraga tsēsa ra ǃâu.

⁶ǂÂi re, ǃKhūtse, sa ǀkhomxaǂgaosigu tsî sa ǃgâiǃnâxasigu xa, ǀamosiba xu gu hâ xuige.

⁷Ti ǂkhamsis di ǁoregu tsî ti ǃûǂamdi xa tā ǂâi re; îts tita xa ǂâi re sa ǃgâiǃnâxasib ǃoa ǃgâisib âts ǃaroma, ǃKhūtse.

⁸ǃKhūb ge a ǃgâi tsî a ǂhanu-ai; ǁnā-amagab ge ǁore-aona daoba ra ǁgau.

⁹ǁÎb ge ǃgamǃgamsenxana ǂhanub ǃnâ ra ǂgaeǂgui, tsîb ge ǃgamǃgamsenxana daob âba ra ǁgau.

¹⁰ǃKhūb di daogu hoagu ge a ǀkhom tsî a ama, ǁnān, ǁîb di ǃgaeǀhaos tsî ǁîb di ǃkhō-amde ra sâun tawa.

¹¹Sa ǀons ǃaroma ǃKhūtse, ǀûba re ti ǀhapisa, ǁîs a kai xuige.

¹²Tariba ǁnā aob, ǃKhūba ra ǃaoǃgâba? ǁÎb ge ǁnā daob, ǁhûiǂuibasenni nîba ra ǁgau bi.

¹³ǀOms âb ge ǃgâib ǃnâ nîra hâ, tsî surib âb ge ǃhūbaiba nîra ǀumi.

¹⁴Khoexasib ǃKhūb dib ge ǁnān ǁîba ǃaoǃgâ hâna ra hâba; tsî ǃgaeǀhaos âbab ra ǁîna ǂanǂan.

¹⁵Ti mûra ge hugaǀgui ǃKhūb ai ra kō, ti ǂairab nî ǀûisa xu ǂgaeǂguiǂui amaga.

¹⁶ǂNan re tita ǃoa î ǀkhomxa te re, ǃū-aisa tsî ǀkhomǀkhomsase ta hâ xuige.

¹⁷ǂŌǂōsigu ti ǂgaob digu ge kaise go kai; ǂgaeǂguiǂui te re ti ǁgâiǀāga xu.

¹⁸Kōǀî re ti ǀkhomǀkhomsasib tsî ti ǀhupub tsîkha, î ūbēba te re ti ǁoregu hoaga.

¹⁹Kō re ti khākhoena, ǁîn a ǂgui xuige, tsîn ge tita ǀgaisa ǁkhanni ǀkha ra ǁkhan.

²⁰Sâu re ti ǀomsa, î ore te re, î ta tā taotaohe re, sa ai ta ra ǂgomaiǂnûi xuige.

²¹A kha ǂhauǃnâsib tsî eloǃaoǃgâsib tsîkha sâu te re, satsa ta ǃâu hâ xuige.

²²Ti Elotse, Israela ore re ǁîb di ǂōǂōsigu hoaga xu.