Read Khoekhoegowab Psalmdi 27 Bible Online

Psalmdi 27 - Khoekhoegowab bible

Psalmdi 27

¹ǁNaetsanas Davib dis. ǃKhūb ge a ti ǃnâ tsî ti ǃgâiǃōsi, tari-i aiǃâ ta kha nî ǃao? ǃKhūb ge a ti ûib di ǀgai, tari-i aiǃâ ta kha nî ǀkhū?

²ǂKhabadī-aon ga ti ǃoagu ǀgūo, ti mâǃoasaben tsî ti khākhoena, ti ǁgansan nî ōse, on ge ǁîna ǃnôa tsî nîra ǁnā.

³Toroǂnubis ga tita xāǂgā xaweb ge ti ǂgaoba ǃao tide; torob ga ti ǃoagu khâi xawe ta nî ǂgomaiǂnûi.

⁴ǀGui xū-e ta ge ǃKhūb tawa ra ǂgan, ǁî-e ta ge nî ôa; î ta ǁan ǃKhūb ommi ǃnâ ti ûib di tsēdi hoadi kōse, kōǀî ta nîse ǃKhūb di îsasiba, tsî ǂâiǂâisen ta nîse tempeli âb ǃnâ.

⁵ǁÎb ge tita oms âb ǃnâ ra gaugau ǂkhabab di tsēs ai; ǁîb ge tita tabernakeli âb di ǂganǃgâsa ǃkhais ǃnâ ra sâu; ǁîb tita ǃhaob ai ra ǀgapiǀgapi amaga.

⁶Tsî ti danas ge ǁkhāti nēsi nî ǀgapiǀgapihe ti khākhoen, ti ǂnamipe hân ǂamai; tsî ta ge ǁîb di tabernakeli ǃnâ dâǁguibade nîra ǁguiba; ǁnae ta nîra, ā, ǃKhūba ta nî psalmǁnaeba.

⁷ǁNâu re ǃKhūtse, ti domma, ǃgarise ta ge ra ǂgai; î ǀkhomxa te re, î ǃeream te re.

⁸Ti ǂgaob ge sats ge mî mîsa ra ǁgui-aiǃâ tsi: Ti aisa ôa, tita on ge sa aisa ra ôa, ǃKhūtse.

⁹Sa aisa tā gaugau re ti aiǃâ, sa ǃgāba tā ǁkhaebē re ǁaixasib ǃnâ; sats hugaǀgui ti hui ge itsa; tā ǁnāxū te re, î tā sa ǃomma tita xu ǂgaebē re, Elotse, ti ǃgâiǃōtse!

¹⁰Ti îb tsî ti îs tsîra ge ge ǁnāxū te, xawe ǃKhūb ge tita nîra ǃkhōǃoa xui-ao.

¹¹ǃKhūtse, sa daoba ǁkhāǁkhā te re; î ǂgaeǂgui te re ǂhanu daob ai, ti khākhoen ǃaroma.

¹²Tā māǁnâ te re ti mâǃoasaben di ǁaib ǃnâ, ǂkhaba ǀhûǀguitimî-aon ge ti ǃoagu ra khâima xuige, tsî ǁkhāti ǂkhababa ra ǀomǂuina.

¹³ǂGom tama ta ka io, ǃgâib ǃKhūb diba ta ûitsaman di ǃhūb ǃnâ nî mû ǃkhaisa, o ta ge kā hâ.

¹⁴ǃKhūba ǃâuhâhâ re; ǂgomǃgâ î ǀgai re; ā, ǃKhūba ǃâuhâhâ re.