Read Khoekhoegowab Psalmdi 31 Bible Online

Psalmdi 31 - Khoekhoegowab bible

Psalmdi 31

¹ǁNaetsanas Davib dis, ǂam ǁnae-aobab ge dības. Sats ǃKhūts ai ta ra ǂgomaiǂnûi; a ta tā taotaohe re, ǀamosib kōse; huiǂui te re sa ǂhanu-aisib ǀkha.

²Sa ǂgaesa ǂō re tiǀî, î ǃnoesase hui te re; ǀgaisa ǃhaose ība te re, tsî kaise ǀgaisa omse, î hui te re.

³Sats ge a ti ǃgareǀui tsî ti ǁaposa ǁanǃkhai, xuige ǂgaeǂgui te re, î daoǁgau te re sa ǀons ǃaroma.

⁴ǂOa kai te re ǁnā ǀûis ǁîn go gaugauba tesa xu, sats a ti ǀgai xuige.

⁵Sa ǃomǁae ta ge ti gagasa ra māǁnâ; sats ge ge ore te, sats ǃKhūts amab di Elotsa.

⁶Sats ge ǁnān, ǁau ǂhumixūn ai ra ǃgaoǃgâna ra ǁkhan; xawe tita ge ǃKhūb ai ra ǂgomaiǂnûi.

⁷ǃGâiaǂgao tsî dâ kai te re, sa ǃgâixasib ǃnâ, ti ǀkhomǀkhomsasibats go kōǀî tsî ti ǀomsats go ǂōǂōsigu ǃnâ ǂan i amaga.

⁸Khākhoeb di ǃomǁaets go māǁnâ te tama i, sats ge ti ǂaira hara ǃkhais ai go mâi.

⁹Tita ǀkhomxa re ǃKhūtse, ǃao ta ra xuige; ti mûs ge ǃoab xa ǂkhabu hâ, ti ǀoms tsî ti soros tsîra.

¹⁰Ti ûib ge ǃoab xa hapuhe hâ, tsî ti kuriga ǀhâimâinǀoms xa; ti ǀgaib ge ti ǂhanuoǃnâsiba xu khôa hâ, tsî ti ǂkhōgu ge ǂkhabu hâ.

¹¹Ti mâǃoasaben hoan ǃaroma ta ge ǁkhāti ti ǀgūkhoen mûǁae îbe a ǃharaxūhesa; tsî ti ǂansabena ta ge a ǃhuriǃhurisaba; ǃās daob ai ra mû ten ge ra ǁhâxū te.

¹²ǁŌ hâ-i axase ta ge ǂgaob khoen dib ǃnâ ǀuruhe hâ; khôa hâ xapa-i ase ta ī.

¹³ǂGuin di ǀhoesa ta ra ǁnâu xui-ao; ǃaob xa ta xāǂgāhe hâ; ǀhûpen ra ti ǃoagu ǀapeǀape amaga. Ti ûiban kom ū ǂgao hâo.

¹⁴Xawe tita ge sa ai ra ǂgomaiǂnûi; ǃKhūtse, tita ge: Sats ge a ti Elo, ti ra mî.

¹⁵Ti ǁaegu ge sa ǃomǁae hâ; ore te re ti khākhoen di ǃomǁaeba xu, tsî ti ǃgôaǃgonaona xu.

¹⁶Sa aisa as sa ǃgāb ǂamai ǃnâ; ore te re sa ǃgâixasib ǀkha.

¹⁷ǃKhūtse, tā a ta taotaohe re, satsa ta ra ǂgaiǀî xuige; an eloxoresana taotaohe re, în kā tsî ǁgôa, ǁō hân hâǃkhais ǃoa.

¹⁸ǂHumi-amǁgauga a gu ǃnōǃari, ǁnāgu, ǂhanu-aib ǃoagu ǃgarise ra ǃhoaga, ǃgurib tsî ǃharaxūb tsîkha ǃnâ.

¹⁹Okha, matikōseb a kai sa ǃgâisib, satsa ǃaoǃgâ hânats ǁguibēba hâb, sats ai ǂgomaiǂnûi hânats sîsenǂuiba hâba, khoen ôan ais aiǃâ.

²⁰Sats ge ǁîna ǂganǃgâsa ǃkhais sa ais dis ǃnâ ra gaugau, khoesib di ǂkhaba ǀapede xu; sats ge ǁîna ommi ǃnâ ra sâu, namdi di ǂnoaguba xu.

²¹Ab ǃKhūba karehe, ǁîb di buruburuxa ǃgâisibab ge ǁaposa ǃās ǃnâ a ǁgau te ǃkhais xa.

²²Tita ge ti ǃaob ǃnâ ge mî: ǃGaoǁnâhe ta hâ sa mûǁaeba xu, xawets ge ti ǀkhomabasendi di domma go ǁnâu, ǂgai ta go ǃnubai.

²³ǃKhūba ǀnam re, sadu ǁîba ǃaoǃgâ hâ du hoado! ǃKhūb ra ǂgomsana sâu, tsî ǃnāǂamsase ǃguriǂgaoxana dīdawa-am xuige.

²⁴ǀGai re, îb ǁîba sadu ǂgaoba ǀgaiǀgaiǃnâ sadu, ǁîb ai ra ǂgomaiǂnûidu hoado.