Read Khoekhoegowab Psalmdi 33 Bible Online

Psalmdi 33 - Khoekhoegowab bible

Psalmdi 33

¹Dâxase ǁnae re sadu ǂhanu-aido ǃKhūb ǃnâ; ǂhauǃnâ-i ge kare i nî ǃkhaisa a anu.

²Kare re ǃKhūba harpdi ǀkha; psalmǁnaeba bi re disiǁapaxa ǀkhō-ūdas ai.

³ǀAsa ǁnaetsana-e ǁnaeba bi re; îsase ǀkhō re dâxa ǀōb ǀkha.

⁴ǃKhūb di mîs ge a ǂhanu, tsî sîsenni âb hoab ge a ǂgomǂgomsa xuige.

⁵ǁÎb ge ǂhanu-aisib tsî ǂhanub tsîkha ǀnam hâ; ǃhūbaib ge ǃgâisib ǃKhūb dib xa ǀoa hâ.

⁶ǃKhūb di mîsa xu gu ge ǀhomga ǂnubihe hâ, tsî ǁîgu di ǂnubis hoasa ǁîb ams di gagasa xu.

⁷ǁÎb ge hurib di ǁgamga ǀgui ǃkhais ais axase ra ǀhaoǀhao. ǁÎb ge ǁîga sâuǃnâ-ommi ǃnâ ra ǁgui.

⁸Ab ǃhūbaib hoaba ǃKhūba ǃao; an ǃhūbaib ai ǁan hân hoana ǁîba saua-ai.

⁹ǁÎb ge ǃhoao, o i ge ge ī; ǁîb ge mîmāo, o i ge ge mâ xui-ao.

¹⁰ǃKhūb ge ǀūben di ǀapesa ra hîkākā; ǁîb ge ǁaedi di ǂâide ra ǁaudī.

¹¹Xawe ǀapes ǃKhūb dis ge ǀamosib kōse ra hâhâ, ǂgaob âb di ǂâide nē ǃhaosa xu nau ǃhaos ǃoa.

¹²ǃGâiǃōs ge hâ ǁnā ǁaes ǃKhūba ǁîn di Elose ūhâs, ǁnā ǁaes, ǁîb ǀumis âb ase ǁhûiǂuibasen hâsa.

¹³ǃKhūb ge ǀhomma xu ra kō, tsî khoen ôan hoana ra mû;

¹⁴ǁîb ge ǁaposa hâǃkhais âba xu ǃhūbaib ai ǁan hân hoana ra mû.

¹⁵ǁÎb ge ǁîn hoan di ǂgaoba ge kuru, ǁîb ge ǁîn di sîsengu hoaga ra ǃgaoǃgâ.

¹⁶Gao-aob ge kai ǀgaib âba xu dan tama hâ; ǁē-aob ge kai ǁkhāsib âba xu orehe tama hâ.

¹⁷Hāb ge a ǁauxū dansa ǃoa; tsîb ge kai ǀgaib âb ǀkha ǃnoraǃnora tama hâ.

¹⁸Mû, ǃKhūb di mûs ge ǁnān, ǁîba ra ǃaoǃgân ai hâ, ǁnān, ǁîb di ǃgâixasib ai ra ǂgomaiǂnûin ai,

¹⁹ǁîn di ǀomsab nî ǁōba xu ore, tsî ǃâtsūǀkhāb ǃnâb nî ǁîna ûi kaise.

²⁰Sida ǀoms ge ǃKhūba ra ǃâubasen; ǁîb ge a sida hui tsî sida khōsikhō.

²¹Sida ǂgaob ge ǁîb ǃnâ ǃgâiaǂgao hâ; ǁîb di ǃanu ǀons ai da ra ǂgomaiǂnûi xui-ao.

²²Sa ǃgâixasiba, ǃKhūtse, ab sida ǂama hâ, sa ai da ra mûmâinǃgâ khami.