Read Khoekhoegowab Psalmdi 34 Bible Online

Psalmdi 34 - Khoekhoegowab bible

Psalmdi 34

¹ǁNaetsanas Davib dis, Abimelexi aiǃâb ge īsib âba ge ǀkharaǀkhara tsî ǁîb xa ǃhaebēhe tsî ge ǃgûbē. Kare ta nî ǃKhūba mâ ǁaeb hoab ai; ǁîb di koas ge hugaǀgui ti ams ǃnâ nî hâ.

²Ti ǀoms ge ǃKhūb ǃnâ nî koasen; an ǀkhomǀkhomsana ǁîsa ǁnâu tsî ǃgâiaǂgao.

³ǃKhūba tita ǀkha kaikai re; î da ǀhûpe ǀons âba ǀgapiǀgapi re.

⁴ǃKhūba ta ge ge ôa tsîb ge ǃeream te; tsî ti ǃaob hoaba xu ge xore te.

⁵ǁÎb ain ge ge kō; os ge ǁîn aisa ge ǃnâǃnâhe, tsî aidi ân ge taotaohe tama ge hâ i.

⁶Nē hâ ǀkhomǀkhomsabeb ge ge ǂgai, tsîb ge ǃKhūba ge ǁnâu; tsîb ge ǂōǂōsigu hoagu âba xu ge ore bi.

⁷ǀHomǃgāb ǃKhūb dib ge ǁnān ǁîba ra ǃaoǃgân ǂnamipe ra ǁgoe, tsî ǁîna ra huiǂui.

⁸Tsâtsâ, î mû ǃKhūb a ǃgâi ǃkhaisa; ǃgâiǃō i ge hâ ǁnā khoe-i ǁîb ai ra mûmâinǃgâ-e.

⁹ǃKhūba ǃaoǃgâ re sadu ǁîb di ǃanudo, ǁîba ra ǃaoǃgân ge ǂhâsi-i xare-e ūhâ tama hâ.

¹⁰Xammi ǂkhamron ra tsâ tsî ra ǃâ, xawe ǃKhūba ra ôan ge ǀgui xū-i xare-i ǃnâ tôasi-e ūhâ tama hâ.

¹¹Hā ǀgôado, tita ǃgâ re; tita ge ǃKhūb di ǃaoǃgâba nî ǁkhāǁkhā du.

¹²Tariba ǁnā khoeb, ûiba ra turab, ûitsēde ǀnam hâba, ǃgâibab nî mûga?

¹³Sâu sa namsa ǂkhababa xu, tsî sa amǁgaukha î kha tā gāxaǃnâse ǃhoa.

¹⁴ǂGō re ǂkhababa xu, î ǃgâiba dī re; ôa re ǂkhîba, î sauruǃgon bi re.

¹⁵ǃKhūb di mûra ge ǂhanu-ain ai hâ, tsî ǁîb di ǂgaera ǁîn di ǂgais ai.

¹⁶ǃKhūb di ais ge ǁnān ǂkhababa ra dīn ǃoagu hâ, ǁîn di ǂâiǂâisensab nî ǃhūbaiba xu ǃhomǂuise.

¹⁷ǂHanu-ain ra ǂgai, ob ra ǃKhūba ǁnâu tsî ǁîn di ǂōǂōsigu hoaga xu ǁîna ra huiǂui.

¹⁸ǃKhūb ge ǀgūse hâba ǁnān, khôaǂkhūsa ǂgaoga ūhâna, tsîb ge khôaǂkhūsa ǂâidi â-ina ra sâu.

¹⁹ǂHanu-ai-i ge ǂgui tsūǃōna ra ǃoa, xawe ǃKhūb ge ǁî-e ǁîn hoana xu ra huiǂui;

²⁰ǁÎb ge ǁî-i di ǂkhōgu hoaga ra sâu, ǁîgu di ǀguib xareb ge khôahe tide.

²¹ǂKhabasib ge eloxoresa-e nîra ǃgam; tsî ǂhanu-ai-e ra ǁkhan khoen ge nîra ǁkharahe.

²²ǃKhūb ge ǁîb ǃgāgu di ǀomsa ra ore; tsî ǁîb ai ra ǂgomaiǂnûin hoan ge ǀǁkharahe tide.