Read Khoekhoegowab Psalmdi 35 Bible Online

Psalmdi 35 - Khoekhoegowab bible

Psalmdi 35

¹ǁNaetsanas Davib dis. ǂNoagu re ǃKhūtse, ti ǂnoagu-aon ǀkha, ǃkham re tita ra ǃkhamūn ǀkha.

²ǃKhō re khōsikhōb tsî tsarib tsîkha; î khâi re, titats nî huise.

³Î ǁhâigôaba ūǀkhī re î ǁkhae re ti ǃgôaǃgonaona, î ti ǀomsa ǃoa: Sa ǃgâiǃō ta ge tita, ti mî re.

⁴An tao în taotaohe re ti ǀomsa ra ôana; an ǁkhaedawahe în taob xa dāhe re, tita ǃoagu ǂkhababa ra ǂâina.

⁵An ǂoab xa ra doeǁgahe ǀhōb khami ī re, îb ǃKhūb di ǀhomǃgāba ǁîna ǂhābē re.

⁶Ab ǁîn di daoba ǃkhae tsî ǂkhanu, îb ǃKhūb di ǀhomǃgāba ǁîna ǃgôaǃgon re.

⁷ǃAroma-i osen ge ǁîna ǁnoaba tita xu ge gaugau, ǁausen ge ti ǀomsa ā-e ge khaoba xuige.

⁸As hîǀhurusa ǁîb ǂama hā re ǀūb a hîa, îb ǁnoab, ǁîb ge gaugauba, ǁîb ǂûba ǃkhō re, ab ǁîb ǃnâ hîkākāsen rase ǁnāǂgâ re.

⁹Os ge ti ǀomsa ǃKhūb ǃnâ nîra dâ, os ge ǁîb di ǃgâiǃōb ǂama nîra ǃgâiaǂgao.

¹⁰O gu ge ti ǂkhōgu hoaga nîra mî: ǃKhūtse, tari-e sats khami ī-e? Sats, ǀkhomǀkhomsabeba ǁîb xa ǀgaisaba xu ra orets, tsî ǀkhomǀkhomsabeb tsî ǂhâb ǃnâ hâba ǀâǀhana-aoba xu.

¹¹ǂHanuoǃnâ ǀhûǀguitimî-aon ge ra khâi; ǀū ta a xūnan ra dî te.

¹²ǃGâib aman ra tsūba mādawa-am te, ti ǀomsan ra ǀâǀhana.

¹³Xawe ta ge tita ǁîn ge ǀaeseno, ǃoab saraba gere ana, tsî ta ge ti ǀomsa ǂûtamahâs ǀkha gere tsûtsû. Tsî ti ǀgores ge ti tîǂams ǃnâ ǁkhawa ge oa.

¹⁴ǀHōsa-i as axase, ǃgâsa-i as axase ta ge ge ǃgûma. ǂNū saran ǃnâ ta ge ge ǃgû, ǁî-i îs ǃaroma ǃoa hâ khoe-i axase.

¹⁵Xawe ǁnā ta geo, on ge ǃgâiaǂgao tsî ge ǀhû; on ge ǃhaokhoen tsî ǂan tama ta hâna ti ǃoagu ge ǀhao, tsîn ra ǃhō te ǀûs ose.

¹⁶Hînaxaǃnân tsî ǃhōxa tāb horesan ǃnân ge tita ǂama ra ǁaninǁgû.

¹⁷ǃKhūtse, matikōsets kha ǁîsa nî kō? Ti ǀomsa ore re ǁîn di hîǀhurude xu, ti ûiba ǂkham xamga xu.

¹⁸O ta ge kai ǀhaohâb ǃnâ nîra koa tsi; o ta ge kaise ǂgui khoen ǃnâ nîra kare tsi.

¹⁹An tā ti ǂama ǃgâiaǂgao re, ǂkhabaxūn ǃaroma ti khākhoese ība tena; an tā mûdi ǀkha nape, ǁause ra ǁkhan tena.

²⁰ǂKhîb xan ge ǃhoa tama hâ xui-ao, xawen ge gāxaǃnâsi xūna ǃhūb ǃnâ ǃnōsase hân ǃoagu ra ǂâiǂâisen.

²¹Tsîn ge ams âna harase ti ǃoagu ra khowa; nētin ra mî: ǁNā a, ǁnā a, sida mûs kom go mûo.

²²ǃKhūtse, sats go mû; tā ǃnō re. ǃKhūtse, tā ǃnūse hâxū te re.

²³ǃNoaǂkhai î ǂkhaikari hâ re ti ǂhanubǀî, ti Elo tsî ǃKhūtse, ti dīǃkhaisǀî.

²⁴ǂHanuǂhanuba te re sa ǂhanu-aisiba ǃoa ǃKhūtse, ti Elotse; în tā ti ǂama ǃgâiaǂgao re;

²⁵în tā ǁîn di ǂgaob ǃnâ mî: ǁNā a, sida turaba! An tā mî: Hapu bi da go.

²⁶An tao, în taob xa dāhe re, ti tsūǃōb ǃnâ ra ǃgâiaǂgaona; an taob tsî ǃharaxūb ǀkha anahe re, ti ǃoagu ra kaikaisenna.

²⁷An ǁîna dâ tsî ǃgâiaǂgao, ti ǂhanu-aisib ǃnâ turaba ūhâna, în hugaǀgui mî re: Kaib ge ǁnā ǃKhūb, ǁîb ǃgāb di ǂkhîba ǂgao hâba.

²⁸Os ge ti namsa sa ǂhanu-aisiba nîra ǂhôa, tsî sa koasa hoaraga tsēsa.