Read Khoekhoegowab Psalmdi 37 Bible Online

Psalmdi 37 - Khoekhoegowab bible

Psalmdi 37

¹ǁNaetsanas Davib dis. Tā ǁaixa re ǂkhabadī-aon ǂama, î ǂhanuoǃnâse ra sîsen khoena tā suri re;

²ǀgâb khamin ra ǃhaese ǂnâ tsî ǃam ǁhaon khamin ra ǃū xuige.

³ǃKhūb ai ǂgomaiǂnûi re, î ǃgâiba dī re, ǃhūb ǃnâ ǁan re, î ǂgomǂgomsase tanisen re.

⁴ǃGâiǃgâisen re ǃKhūb ǃnâ, ob ge sa ǂgaob di tura-aiga nîra mā tsi.

⁵ǃKhūb ai gawa sa daoba; î mûmâinǃgâ bi re, ǁîb ge nîra dība tsi xuige.

⁶Tsîb ge sa ǂhanu-aisiba nîra ǀkhī kai, ǃnâb ra ǀkhī khami, tsî ǂhanub âtsa tsēǃgâǁaeb khami.

⁷ǃKhūba ǃnōba î ǁîba ǃâubasen re; tā ǁaixa re ǁnān, ǁîn di daob ǃnâ ǃgâiǃgâse īn ǂama, tsî ǁnā khoeb, gāxaǃnâsi ǂâibasende ra sîsenǂuib ǂama.

⁸ǁÎba ǀûǀkhā re î ǁnāxū re ǁgôasiba; tā ǁaixa re, ǁaib ge ǂkhabab ǀguiba ra sîsen.

⁹Tsūdī-aon nîra ǃhomǂuihe xuige, xawe ǃKhūba ǃâubasen hân ge ǃhūbaiba nîra ǀumi.

¹⁰Ganupe ǂkharirose ǁnam, ob ge eloxoresaba nî ǀkhai; tsîts ge ǁîb di hâǃkhaisa nî ǃgaoǃgâ xaweb ge ǁnāpa hâ tide.

¹¹Xawe tsamtsiǃnân ge ǃhūbaiba nîra ǀumi, tsî kai ǂkhîb ǃnâ nîra ǃgâiǃgâisen.

¹²Eloxoresab ge gāxaǃnâsi ǂâibasende ra ǂâi ǂhanu-aib ǃoagu, tsîb ge ǁîb ǂama ra ǁaninǁgû;

¹³ǃKhūb ra âiǂui bi, ǁîb di tsēs ra hā ǃkhaisab ra mû xui-ao.

¹⁴Eloxoresan ge gôaba go ǂgaeǂui, tsî khāsa go ǂgaeǃnâ, ǀkhomǀkhomsabeb tsî ǂhâb ǃnâ hâban nî ǁkhâuǁguise, tsî ǂhauǃnâ ǂgaob â-iban nî ǂāse.

¹⁵Xawe gôab ân ge ǁîn di ǂgaob ǂûb ǃnâ nîra ǂgâ; tsî khādi ân ge nîra khôaǂkhūhe.

¹⁶Nē ǀoro xūron, ǂhanu-aib ūhân ge ǂgui eloxoresan di ǂgui xūn ǃgâ-ai a ǃgâi;

¹⁷Eloxoresan di ǁôagu ge nîra khôahe xui-ao, xawe ǃKhūb ge ǂhanu-aina ra ǂkhâǃnâ.

¹⁸ǃKhūb ge ǂhauǃnân di tsēde a ǂan, tsî ǀumis ân ge ǀamosib kōse nîra hâ.

¹⁹ǁÎn ge tsū ǁaeb ai taotaohe tide; tsî ǃâtsūǀkhāb di tsēdi ain ge nîra ǁâǁâhe.

²⁰Xawe eloxoresan ge nîra kāǁō, tsî ǃKhūb di khākhoen ge ǃû-ais di îsasib axase nîra ǀkhai; ǀanni khamin ge nîra bē.

²¹Eloxoresab ra ǀkhupi tsî ǁkhawa mā-oa tama xawe ǂhanu-aib ge ǀkhom tsî ra mā.

²²ǁÎb di ǀkhaehesan ge ǃhūbaiba nîra ǀumi, xawe ǁîb di ǀâxarexūhesan ge nîra ǃhomǂuihe xui-ao.

²³Khoeb di ǃgûs ge ǃKhūb xa ra ǁapoǁapohe, daob âb ga ǃgâiba bio;

²⁴ǁNāb rao, ob aoxūhe tama, ǃKhūb ra ǃommi âba ǂkhâǃnâ amaga.

²⁵Tita ge ǂkham ge i, tsî ta ge go kaira, xawe ta ge tātsē mû tama ge hâ i, ǂhanu-aib ra ǁnāxūhesa, tsî surib âb ra pere-e ǀkhopemasa.

²⁶Tsēs hoasab ra ǀkhomxa tsî ra ǀkhupi; tsî surib âb ge ǀkhaehe hâ.

²⁷ǂGō re ǂkhababa xu, î ǃgâiba dī re; ots ge ǀamose nîra ǁan.

²⁸ǃKhūb ge ǂhanuba ǀnam hâ, tsîb ge ǂhanu-aina ǁnāxū tide; ǀamosen ge nîra sâuhe, xawe eloxoresan di surib ge ra ǃhomǂuihe;

²⁹ǂhanu-ain ge ǃhūbaiba nîra ǀumi, tsî ǀamose ǁîb ai nîra ǁan.

³⁰Ams ǂhanu-aib dis ge gā-aisiba ra ǂhôa, tsî nams âb ge ǂhanuba ra ǃhoa.

³¹ǂHanub Elob âb dib ge ǁîb di ǂgaob ǃnâ hâ; ǁîb di daogu ge ǁnobe tide.

³²Eloxoresab ge ǂhanu-aiba ra ǃkhē, tsî ra ǃgam bi ǂgao;

³³xawe ǃKhūb ge ǁîba ǁîb ǃomǁae māǁnâ tide; tsîb ge ǀâxarexū bi tama, ǀgoraǃgâheb rao.

³⁴ǃKhūba ǃâubasen re, î ǁîb di daoba ǃkhōǀgara re, ob ge ǁîba nîra ǀgapiǀgapi tsi, îts ǃhūbaiba ǀumi; sats ge nîra mû eloxoresan ra ǃhomǂuihe ǃkhaisa.

³⁵Tita ge ǃnâudanaxa eloxoresaba ge mû, ǃam tsî ǃnomaǃnomasen hâ hais khami ra khoraǂuisenna.

³⁶Xawe ǁnās khaoǃgâ ta ge ǃgûǃkharuo, mû, ob ge ǀkhai ge i; tita ge ge ôa bi, xaweb ge hōhesa tama ge hâ i.

³⁷Eloǃaoǃgâxaba ǃgaoǃgâ re, î ǂhauǃnâba kō re; ǂkhî khoeb di ǀams ge a ǀkhaehesa xuige.

³⁸Xawe ǃûǂamaon ge ǀhûpe ra hîkākāhe; eloxoresan di ǀams ge a kāǁō.

³⁹Xawe ǃgâiǃōsib ǂhanu-ain dib ge ǃKhūba xu hâ; ǁîb ge ǁîn di ǁaposa hâǃkhaiba ǂōǂōsib di ǁaeb ai.

⁴⁰ǃKhūb ge ǁîna nîra hui tsî nîra ore; eloxoresana xub ge ǁîna nîra ore tsî nîra sâu, ǁîb ain ra ǂgomaiǂnûi xui-ao.