Read Khoekhoegowab Psalmdi 38 Bible Online

Psalmdi 38 - Khoekhoegowab bible

Psalmdi 38

¹ǁNaetsanas Davib dis, ǂâiǂâisens ase. ǃKhūtse, tā ǁkhara te re sa ǁaixasib ǃnâ, î tā ǂnau te re sa ǁgôasib ǃnâ.

²Sa ǂāgu ge ti ǃnâ go ǂgâ, tsî sa ǃommi ge ti ai go hā xuige.

³ǂGauǃkhai-i xare-i ge ti ǁgans ǃnâ hâ tama hâ, sa ǁaib ǃaroma; tsî ǂurusi-i xare-i ge ti ǂkhōgu ǃnâ a ǀkhai, ti ǁoreb ǃaroma.

⁴Ti ǀhapidi ge ti danasa ra īǂam; ǁîdi di ǃgommi xa ta ge go dāhe.

⁵Ti ūǀhapidi ge ra ǀō, ǁîdi ge ǁgao hâ ti gâresib ǃaroma.

⁶Tita ge go ǃhoa, îbe ta gama hâ, tsēs hoasa ta ǂnū sarab ǃnâ ra ǃgû.

⁷Ti kamanab ge ǀaeb xa ǀoa hâ; tsî ǂuruǃkhai-i xare-i ge ti ǁgans ǃnâ a ǀkhai.

⁸ǂKhabusa ta a, kaise ta ǂnauǂkhūǂkhūhe hâ; ǃgae ta ra ti ǂgaob ra ǂnau ǀgaus xa.

⁹ǃKhūtse, sa aiǃâb ge ti turab hoaba hâ; tsî ti ǀhâimâinǀoms ge sa aiǃâ gaugausa tama hâ.

¹⁰Ti ǂgaob ge ǃgaugub ǃnâ hâ, ti ǀgaib ge go ǁnāxū te; tsî ti mûra di ǃnâb ge a ǀkhai.

¹¹Ti ǀnamsaben tsî ti ǀhōsan ge ti tsû-aina xu ūbēsen hâse mâ, tsî ti ǀgūkhoen ge ǃnūse sī mâ.

¹²Tsî ti ǀomsa ra ôan ge ǁnoaga ra ǁguiba te, tsî ti tsūǃgâba ra ôan ge ǂkhabase ra ǃhoa; tsîn ge hoa tsēsa gāxaǃnâsigu xa ra ǂâiǂâisen.

¹³Xawe tita ge ǂganǂgae-i axase ī, ǁnâu tama hâ-i, tsî ǃgome-i axase, ams â-e khowa tama-e.

¹⁴Ā, khoe-i khami ta ī, ǁnâu tama-i tsî ǃhoaǃoaxū-i xare-e ūhâ tama-i khami.

¹⁵Sats ǃKhūtsa ta ra ǃâubasen; sats ge nîra ǁnâu, ǃKhūtse, ti Elotse.

¹⁶Nēti ta ra mî xui-ao: În tā ti ǂama ǃgâiaǂgao; ti ǂais ga ǃnôao, on ra ti ǃoa-ai kaikaisen.

¹⁷ǂHomisen ta hâ ǁnāsa ǃoa, tsî ti tsûb ge hugaǀgui ti aiǃâ hâ xui-ao.

¹⁸Ti ǀhapisa ta ra ǂanǂan tsi; ǃhausen ta ra ti ǁoren ǂama.

¹⁹Xawe ti khākhoen ge a ûitsama tsî a ǀgaisa; tsî tita ǁause ra ǁkhan khoen ge a ǂgui.

²⁰Tsî ǃgâib ama ǂkhababa ra mādawan ge ti ǃoagu ra khâima, ǃgâiba ta ra sauruǃgon amaga.

²¹Tā ǁnāxū te re ǃKhūtse. Ti Elotse, tā ǃnūse hâxū te re.

²²ǃHaeǃhaesen re hui tets nîga, ǃKhū, ti ǃgâiǃōtse.