Read Khoekhoegowab Psalmdi 39 Bible Online

Psalmdi 39 - Khoekhoegowab bible

Psalmdi 39

¹ǁNaetsanas Davib dis, ǂam ǁnae-aob, Jedutunnab ge dības. Tita ge ge mî: Tita ge ti daoga nî ǃûi, ti nams ǀkha ta ǁore tidega; ti amsa ta tommi ǀkha nî ǃkhōǀgara, eloxoresab ganupe ti ǃoa-ai hâs kōse.

²O ta ge ǃgome tsî ge ǃnōǃari, ǃgâib xa ta ge ǃnō, xawe ti tsûb ge ǃaruǀîǀgui ge ǀarosen.

³Ti ǂgaob ge ti ǃnâ ge ǀgam, ǀaes ge ti ǂâiǂâisens ǃnâ ge khau; ǃnubai ta ge ti nams ǀkha ge mî:

⁴ǃKhūtse, ǂanǂan te re ti ûib di ǀamsa, tsî ti tsēdi a matikōsa; î ta ǂan mati ta ra ǃgû-ī ǃkhaisa.

⁵Mû, sats ge ti tsēde ǃommi a ǂhabas kōse ge mâi; tsî ti ûiǁaeb ge xū tamase i sa aiǃâ. Amase, mâ khoe-i hoa-i, matikōse i ga ǀgaisase mâ xawe i kom a ǁauo. Sela.

⁶Khoeb kom som-i khami ra ǃgûmao, ǁausen kom ra ǀhupuo; ǀhaoǀhao tsîn kom a ǀūo tari-i nî ǁîn khaoǃgâ xūna ūsa.

⁷Tsî nēsi tare-e ta ra ǃâubasen, ǃKhūtse? Ti ǃâubasens ge sats ǃnâ hâ.

⁸Ore te re ti ǃûǂamdi hoade xu; tā gâre khoeb di ǃharaxūxūse mâi te re.

⁹ǃGome ta go; ti amsa ta khowa tide, sats go ǁîsa dī xui-ao.

¹⁰Tita xu ūbē re sa ǁkhara-aiba; tsanaǁkhui ta hâ sa ǃommi di ǂnoagus xa.

¹¹Khoe-ets ra satsa ǁkharao ǁî-i di ǀhapis ǃaroma, ots ge satsa ǃgâi īsib â-e ra hapu ǁgurib ra dī khami; ǁausib ǀguib kom mâ khoeb hoabao. Sela.

¹²ǁNâu re, ǃKhūtse, ti ǀgoresa, î ǃgâ re ti huiǂgaisa; ti ǁgamron tawa tā ǃnō re; tita ge sa tawa a ǃhaokhoe, ǃgûkhoe ta ge a, ti îgu hoagu ge ī i khami.

¹³Kōbēxū te re, î ta khoakhoasen re, ǃgû ta nî tsî ta nî ǀkhais aiǃâ.