Read Khoekhoegowab Psalmdi 40 Bible Online

Psalmdi 40 - Khoekhoegowab bible

Psalmdi 40

¹ǁNaetsanas Davib dis, ǂam ǁnae-aobab ge dības. Tita ge ǃKhūba ǂomxase ge ǃâubasen; ob ge tiǀî ǂnan, tsî ti ǂgaisa ge ǁnâu.

²Tsîb ge tita ǃaoǃaosa tsaus tsî ǂgoaba xu ūǂui, tsî ti ǂaira ǃhaob ai go mâi, ǁîb ge ti dāǃharode go ǁapoǁapo.

³Tsîb ge ǁîba ǀasa ǁnaetsana-e ti ams ǃnâ go mā, karetsana-i sida Elob dī-e; ǂguin ge ǁîsa mû tsî nîra ǃao tsî ǃKhūb ai nîra ǂgomaiǂnûi.

⁴ǃGâiǃgâxab ge ǁnā khoeb, ǃKhūb ai ra ǂgomaiǂnûib, tsî ǃguriǂgaoxanǀî ǂnan tamab, ǁnān, ǂhumib ǃoa ra ǂgōnǀî.

⁵Sats ǃKhūts, ti Elots, ge sida tawa ǂgui buruxana gere dī, tsî sa ǂâidi ge ǂgui ge i; khoe-i ge sats ǀkha ǀguiti-ī ǁoa; tita ge ǁîna ǂhôa tsî ǃhoaǂui ǂgao, xawen ge ǃhoan ta nîs ǂamai a ǂgui.

⁶ǂĀǁguibadi tsî ǂûǁguibadi ge ǃgâiba tsi tama; sats ge tita ǂgaera go doroǃnamba; khauǁguibas tsî ǁoreǁguibasats ge ǂgaoǀkhā tama hâ.

⁷ǃNubai ta ge tita go mî: Mû, ǃgoaxa ta a, xamihe hâ ǂkhanis ǃnâ tita xa xoahe hâ.

⁸ǂGao ta ra, ti Elotse, sa ǃgâiǂâisa ta nî dīsa; tsî sa ǂhanub ge ti ǃnāb ǃnâ hâ.

⁹Tita ge sa ǂhanu-aisiba kai ǀhaohâb ǃnâ ra ǂhôa; mû, ti amǁgaukha ta ǁkhae tama, ǃKhūtse, sats ge a ǂan.

¹⁰Sa ǂhanu-aisiba ta gaugau tama ti ǂgaob ǃnâ; sa amab tsî sa ǃgâiǃōba ta ra ǃhoaǂui, sa ǀkhomxaǂgaosib tsî ǂgomǂgomsasiba ta kai ǀhaohâb ǃnâ gaugau tama.

¹¹Sats ǃKhūts ge sa ǀkhomxasiga tita xu ūdawa tide; ab sa ǀkhomxaǂgaosib tsî ǂgomǂgomsasiba hugaǀgui sâu te re.

¹²ǃGôaheǁoasa tsūǀkhāgu ge go ǃnamiǂgā te; tsî ti ǀhapidi ge go ǃkhō te, mû ǁoa ta gos kōse. ǁÎdi ge ti danaǀûn ǃgâ-ai a ǂgui, tsî ti ǂgaob ge go ǁnāxū te.

¹³ǁNātikōse ǃgâi, ǃKhūtse, î ore te re; ǃKhūtse, ǃhaeǃhaesen î hui te re.

¹⁴An taotaohe re, în ǀhûpe taob xa dāhe re, ǁnān, ti ǀomsa ra ôan ǁîsan nî hîǀhurusena; an oa kaihe în taotaohe ǁnān, ti tsūǃōb ǃnâ ra ǃgâiaǂgaona.

¹⁵An hîkākāhe re ǁîn taokais di mādawa-ams ase ǁnān, tita xa: ǁNā, ǁnā, ti ra mîna.

¹⁶An sa ǃnâ ǃgâiaǂgao în dâ re hoan, satsa ra ôana; sa ǃgâiǃōba ǀnamna an hugaǀgui: Ab ǃKhūba kaikhaihe, ti mî re.

¹⁷ Tita ge ǀkhomǀkhomsa tsî a ǀgâsa; xawe ǃKhūb ge tita xa ra ǂâi. Sats ge a ti hui tsî ore-ao; ti Elotse, tā ǀhawe re.