Read Khoekhoegowab Psalmdi 41 Bible Online

Psalmdi 41 - Khoekhoegowab bible

Psalmdi 41

¹ǁNaetsanas Davib dis, ǂam ǁnae-aobab ge dības. ǃGâiǃōb ge ǁnā khoeb, ǀgâsa-i xa ra ǂâiba; ǃKhūb ge ǁîba ǂkhaba tsēs ai nîra ore.

²ǃKhūb ge ǁîba nîra sâu tsî nîra ûi kai; ǁîb ge ǃhūbaib ai nîra ǃgâiǃgâxa kaihe. Sats ge ǁîba khākhoen âb di turab ǃnâ māǁnâ tide.

³ǃKhūb ge ǁîba nî ǂkhâǃnâ ǀaesenkharob ai, ǀaesenni âb ǃnâts ge ǁgoeǃkhais âb hoasa ra ǀkharaǀkhara.

⁴Tita ge ge mî: ǃKhūtse, ǀkhomxa te re; ǂgauǂgau te re, sa ǃoagu ta go ǁore xuige.

⁵Ti khākhoen ge ǂkhabase tita xa ra ǃhoa: Mâ ǁaeb nî ǁō tsî ǀons âba mâ ǁaes nî kāǁō? ti.

⁶Tsî ǀgui-i ân ra hāo, mû te i nîse, o i ge ǁau xūna ra ǃhoa; ǁî-i di ǂgaob ge ǂkhabasiba ra ǀhaoǀhaobasen; ǃaugaba ǃoa i ra ǃgûo, o i ge tita xa ra ǃhoa.

⁷Tita ǁkhan hân hoan ge ra ǀhoeǃhoa ti ǃoagu; ǁîn ge ti ǃoagu ǂkhabab xa ra ǂâiǂâisen,

⁸Taotaosa dīǃkhais ge ǁîba ge ǂae-ai, ob ge ǁgoeb hâba xu ǁkhawa khâi tide, ti.

⁹ǁKhāti ti ǂkhîb di khoeb, ǁîb ai ta ge ǂgomaiǂnûib, ti pereba ra ǂûb, ǁîb ge ǃnôara âba ti ǃoagu go ūkhâi.

¹⁰Xawe satsa, ǃKhūtse, ǀkhomxa te re; î khuikhâi te re, o ta ge ǁîna nî dīdawa-am.

¹¹Nēs tawa ta a ǂan, ti ǃnâts ǃgâiǃgâibasensa ūhâ ǃkhaisa, ti khākhoeb ti ǂama dâ tide ǃkhais tawa.

¹²Sats ge tita ti ǂhauǃnâsib ǃaroma ra ǃkhōmâi, tsîts ge sa ais aiǃâ ra mâi te ǀamosib kōse.

¹³Ab ǃKhūba karehe, Israeli Eloba, ǀamosiba xu ǀamosib kōse. Amen. Amen.