Read Khoekhoegowab Psalmdi 42 Bible Online

Psalmdi 42 - Khoekhoegowab bible

Psalmdi 42

¹ǁNaetsanaǂans Koraxi ôagu dis, ǂam ǁnae-aob ge dībahes. ǁKhamab ra ǁgamǀaude ǁkhores ǁkhās khamis ge ti ǀomsa satsa ǁkhore hâ, ti Elotse.

²Ti ǀoms ge ǁgâ hâ Elobǀî, ûitsama Elobǀî. Mâ ǁae ta kha ǂgâ tsî Elob di ais aiǃâ nî ǂhai?

³Ti ǁgamron ge a ti ǂû tsēa tsî tsuxuba, tsēkoroben ra: Mapab hâ sa Eloba? ti mî amaga.

⁴ǁÎs xa ta ra ǂâi, o ta ge ti ǀomsa ti ǃnâ ra ǁhōǂui. ǂNubis ǀkha ta ge gere ǃgû tsî ǁîn ǀkha Elob ommi ǃnâ ǂgâ amaga, dâb tsî gangans di dommi ǀkha, ǁâudī ra ǂnubis ǃnâ.

⁵Tarexas ra ǃoa, ti ǀomse, tsî tarexas ra sâoǃnâ kai te? Eloba ǃâubasen re, ganupe ta nîra kare bi xuige, ǁîb ais di huib ǃaroma.

⁶Ti Elotse, ti ǀoms ge ti ǃnâ ra ǃoa; ǁnā-amaga ta sats xa ra ǂâi Jordanǃāb ǃhūb tsî Hermonna xu, ǂkhari ǃhomma xu.

⁷Dâus ge dâus ǃoa ra ǂgai, sa ǁgammi dâudi di ǀōba xu; sa ǃgabigu tsî sa heradi hoadi ge ra hāǂam te.

⁸Xawe ǃKhūb ge tsēa ǁîb di ǃgâixasiba ra mîmā, tsî tsuxubas ge ǁîb di ǁnaetsanasa ti tawa nîra hâ, ǀgoresa ti ûib di Eloba ǃoa.

⁹Tita ge Elob ǃoa: Ti ǃgareǀuitse, ti nî mî, tare xū-i ǃaromats ta ǀuru te? Tare xū-i ǃaroma ta ǂnū sarab ǃnâ ra ǃgû, khākhoeb di ǁgâiǀāb xa?

¹⁰ǁŌǁōsa ǀhapis ti ǂkhōgu ǃnâ hâ khami ra ība te, ti khākhoen ra ǃhō te, hoaraga tsēsan ra: Mapab sa Eloba hâ? ti mî ǃnubai.

¹¹Tarexas ra ǃoa, ti ǀomse? Tsî tarexas ra sâoǃnâ kai te? Eloba ǃâubasen re, ǁîba ta nî kare xuige; ǁîb ge ǃgâiǃōb ti ais diba, tsîb ge a ti Elo.