Read Khoekhoegowab Psalmdi 44 Bible Online

Psalmdi 44 - Khoekhoegowab bible

Psalmdi 44

¹ǁNaetsanaǂans Koraxi ôagu dis, ǂam ǁnae-aob ge dībahes. Elotse, sida ǂgaedi ǀkha da ge ge ǁnâu; sida îgu ge ǁî ǃkhaisa ge ǁgamba da, sats ge sîsenna ǁîgu di tsēdi ǃnâ gere dī, hugasa xu, ti.

²Sats ge ǃhaode sa ǃommi ǀkha ge doeǁgaǂui, xawets ge ǁîga ge ǃhana; sats ge ǁaede ge hîkākā, xawets ge ǁîga ge khoraǂui.

³ǁÎgu ge ǃhūba ǁîgu di gôaba xu ū tama hâ, tsî ǁîgu di ǁôab ge ǁîga hui tama hâ; xawe sa amǀkhāb ǃommi, tsî sa ǁôab, tsî sa ais di ǃnâb ge ge dī, ǁîgu ǃnâts ge ǃgâiǃgâibasensa ūhâ i amaga.

⁴Sats ǂûts ge a ti gao-ao, Elotse, mîmā re Jakob di dande.

⁵Sa ǃnâ-ū da ge sida khākhoena nîra ǂhāǁgui; sa ǀons ǃnâ da ge nîra dāǃgâ sida ǃoagu ra khâimana.

⁶Tita ge ti khās ai ǂgomaiǂnûi tama hâ xui-ao, tsî ti gôab ge ore te tide;

⁷xawe sats ge sida ra hui sida mâǃoasabena xu, tsîts ge ǁkhan da rana ge tao kai.

⁸Elob ǃnâ da ge tsēs hoasa ra koasen, tsî sa ǀonsa da ge ǀamosib kōse nîra koa. Sela.

⁹Xawets ge nēsi ra ǂhāxu da tsî ra tao kai da; sida toroǂnubidi ǀkhats kom ǃgûǂoa tamao.

¹⁰Sats ge mâǃoasabeba xu ra oa kai da, tsî ǁkhan da ran ge ra ǃnaribasen.

¹¹Sats ge sida ǂāgūn khami ra dī, tsîts ge sida ǃhaodi ǃnâ ra ǀgaruǀgaru.

¹²Sats ge sa ǁaesa xū tama-i ama ra ǁamaxū, tsîts ge hōǂgās âtsa kaikai tama hâ.

¹³Sats ge sida, sida ǀgūkhoena taotaosaxūse ra dība, ǀao tsî ǃhōxūse, sida ra ǁanǂnamipena.

¹⁴Sats ge sida ǂkhoamîse ra ǂnûi ǁaedi ǃnâ; ǃnabindanaxūse khoen ǃnâ.

¹⁵Ti taob ge tsēs hoasa ti aiǃâ hâ, tsî ti ais di taosib ge ra ǃgū-ai te,

¹⁶ǃhō-aob tsî ǃkhāǃkhā-aob di dommi ǃaroma, khākhoeb tsî ǀkhao-aob di mûs ǃaroma.

¹⁷Nē xūn hoan xa da ge ge hāǂamhe, xawe da ge satsa ǀuru tama, tsî ǁkhāti sa ǃgaeǀhaos ǃoagu ǂkhabase dī tama hâ.

¹⁸Sida di ǂgaob ge khaos ǃoa oa tama; tsî sida di ǃgûs ge ǁkhāti sa daoba xu ǂgō tama hâ.

¹⁹Xawets ge ǀgirigu ǃās ǃnâ sida ge ǂkhūǂkhū, tsî ǁōb di sommi ǀkha ge ǃgū-ai da.

²⁰Sida Elob di ǀonsa da ga ǀuru hâo, tsî sida di ǃomga da ga ǃhao elo-i ǃoa ǀhōǂui hâo,

²¹ôaǃnâb kha tide Eloba? ǁÎb kom ǂgaob di ǂganǃgâsiga a ǂano.

²²Sats ǃaroma da ge hoaraga tsēsa ra ǃgamhe; tsî da ge ǂāgūn axase ǃgôahe hâ.

²³ǃNoaǂkhai re, tarexats kha nî ǁom, ǃKhūtse? ǃNoaǂkhai re, î tā ǀamos kōse ǂhāxu da re.

²⁴Tare xū-i ǃaromats kha sa aisa nî gaugau? Tarexats kha sida ǀkhomǀkhomsasib tsî ǁgâiǀāba nî ǀuru?

²⁵Sida ǀoms ge ǃgamǃgamhe hâ tsarab ǃnâ; sida ǃnāb ge ǃhūba ra ǂae-ai.

²⁶Khâi, î hui da re, î ore da re sa ǃgâixasib ǃaroma.