Read Khoekhoegowab Psalmdi 45 Bible Online

Psalmdi 45 - Khoekhoegowab bible

Psalmdi 45

¹ǁNaetsanaǂans, ǀnammi di ǁnaetsanas, Koraxi ôagu dis, ǂam ǁnae-aoba ge dībahes, Sosanims ǃoa. Ti ǂgaob ge ǃgâi mî-e ra ūǀkhī, gao-aoba ta ge ti sîsenga nî dība; ti nammi ge xoa-ūxūb, ǃhaese ra xoa xoa-aob diba.

²Sats ge khoen ôan ǃgâ-ai a îsa; ǀnamǀnamsasib ge sa amǁgaugu ai ǂnâǂuihe hâ, ǁnā-amagab ge Eloba ǀamose ra ǀkhae tsi.

³ǃGae re sa gôaba kamanab âts ai, ǁē-aotse, sa kaisib tsî sa ǂkhaisib tsîkha.

⁴ǃGâiǃgâxase ǃnari re sa ǂkhaisib ǃnâ, amab di mîs tsî ǂhauǃnâ tsamtsiǃnâsib ǃnâ; ob ge sa amǀkhāb ǃomma ǃaoǃaosa xūna nîra ǁkhāǁkhā tsi.

⁵Sa ǂāgu ge a ǀā, ǁaedi ge sa ǃnaga nîra ǁnā; ǁîgu ge khākhoen gao-aob din di ǂgaob ǃnâ ra ǂgâ.

⁶Sa trons, ti Elotse, ǁîs ge ǀamosiba xu ǀamosib kōse ra hâ; gaohais sa gaosib dis ge a ǂhanu.

⁷Sats ge ǂhanu-aisiba ǀnam hâ, tsîts ra eloxoresasiba ǁkhan; ǁnā-amagats ge Elob, sa Elob xa ǂkhauǀkhāhe hâ dâb ǁnui-i ǀkha, sa horesagu ǂamai.

⁸Sa saran hoan ge a mire tsî aukore tsî kasia ǁamaxa; ǂkhoaǁgûgu ǀkha dīhe hâ î-omga xuts ra ǀkhōxūn ǀkha ǃgâiaǂgao kaihe.

⁹Gao-aogu ôadi ge sa ǂkhaisa ǀgôadi ǃnâ hâ; gao-aos ge sa amǀkhāb tawa mâ, Ofiri di ǃhuniǀurib ǃnâ.

¹⁰ǁNâu re, ti ôase, î mû, î ǂō re sa ǂgaesa, î ǀuru re sa ǁaes tsî sa îb di omma.

¹¹Ob ge gao-aoba sa anusib xa nîra ǃgâibahe. ǁÎb a sa ǃKhū, xuige ǁîb aiǃâ ǃhonǁgoa re.

¹²Os ge Tires ǀgôasa, on ge ǁaes ǃnâ ǃkhū hâna ǀkhaexūn ǀkha sa aisa nîra ǀkhoma.

¹³Gao-aob ôas ge hoaragase a ǂkhaisa omǃnāb ǃnâ; saran âs ge a ǂgāǃnâguhe hâ ǃhuniǀuri.

¹⁴ǂGāǃnâguhe hâ saran ǃnâs ra gao-aob ǃoa ǂgaeǂguihe; ǂkham khoedi, ǁîsa ra saodi, ǁîs di horesadi, ǁîdets ra ūhābahe.

¹⁵ǁÎdi ge ǃgâiaǂgaob tsî dâb ǀkha ra ǂgaeǂguihe; ǁîdi ge gao-aob di î-ommi ǃnâ ra ǂgâ.

¹⁶Sa îgu di ǃās ǃnâ gu ge sa ôaga nîra hâ; sats ge ǁîga gaosase nîra ǂnûi ǃhūb hoaragab ǃnâ.

¹⁷Tita ge sa ǀonsa nîra ǂâiǂâiǃnâ ǃhaosa xu ǃhaos ǃoa. ǁNā-amaga di ge ǁaede satsa nîra kare ǀamosiba xu ǀamosib kōse.