Read Khoekhoegowab Psalmdi 48 Bible Online

Psalmdi 48 - Khoekhoegowab bible

Psalmdi 48

¹ǁNaetsanas, psalms Koraxi ôagu dis. ǃKhūb ge a kai tsî karehesa anu, sida Elob di ǃās ǃnâ, ǁîb di ǃanu ǃhommi ai.

²Îsab a ǀgapib âb ai, ǃhūbaib hoab di ǃgâiaǂgaob a ǃhommi Sionna, ǀapas ǀkhāb ai; ǃās kai Gao-aob dis ge a ǁî.

³Elob ge ǁîs di î-omgu ǃnâ hâ; ǁîb ge a ǂansa ǀgapi sâuǃkhaise.

⁴Mû, gao-aogu ge ge ǀhû hâ i tsî gu ge ǀhûpe ge ǃgoaxa i.

⁵Mû gu geo, o gu ge buru tsî ǃhuri tsî ge ǁhai.

⁶ǀKhūb xa gu ge ǁnāpa ge ǃkhōhe, ǃaob xa, ǁora ra taras khami.

⁷Aiǂoas di ǂoab ǀkhats ge Tarsis di doe-omga ra khôaǂkhū.

⁸ǁNâu da ge khami da ge ge mû, ǃās ǂnubidi di ǃKhūb dis ǃnâ, sida Elob di ǃās ǃnâ; Elob ge ǁîsa nîra ǁapoǁapo ǀamosib kōse. Sela.

⁹Elotse, sida ge ra ǂâi sa ǃgâisib xa, sa tempeli ǁaegub ǃnâ.

¹⁰Sa ǀons ī khami, Elotse, ǁnās ǁkhās khamis ge sa koasa ī ǃhūbaib di ǀkhâuǀamdi kōse. Sa amǀkhāb ǃommi ge ǂhanu-aisib xa ǀoa hâ.

¹¹Sionǃhommi ra ǃgâiaǂgao, Judab ǀgôadi ra dâ sa ǀgoraǃgâdi ǃaroma.

¹²ǃGûǂnamipe re Sionsa, î ǃnamiǂgā si re; ǃgôa re ǁîs di ǂgō-omga.

¹³ǁÎs di ǁaposasiba ǃgaoǃgâ re, ǁîs di î-omga ǃgûǃganu re, î du ǁîsa ǃgoaxa ǃhaode ǂhôa.

¹⁴Nē Elob a sida di Elo ǀamose tsî hugaǀgui xuige. ǁÎb ge ǀamos kōse nîra ǂgaeǂgui da.