Read Khoekhoegowab Psalmdi 49 Bible Online

Psalmdi 49 - Khoekhoegowab bible

Psalmdi 49

¹ ǁNaetsanas Koraxi ôagu dis, ǂam ǁnae-aob ge dībahes. Nēsa ǁnâu re, sa ǁaeso hoaso; ǁnâuǃā ǁîsa re, ǃhūbaib ǃnâ ǁan hâdu hoado,

²Gâre du karao, ǀgapi khoe du karao, hoa du ǃkhū hâ du karao, ǀgâsa du karao.

³Ti ams ge gā-aisib ǀguib xa nî ǃhoa; tsî ǂâiǂâisens ti ǂgaob dis ge ǁnâuǃāb xa nî ǀoa.

⁴Ti ǂgaesa ta ǂkhoamî-iǀî nî ǂō; ǂganǃgâsa mîǃnôa-e ta harps ai nî ǁguiǃā.

⁵Tare xū-i ǃaroma ta kha nî ǃao tsūǃgâb di tsēdi ai, ǂhanuoǃnân di dīsās xa ta ga xāǂgāheo,

⁶ǁnān, ǁîn di xūn ai ra ǂgomaiǂnûin, tsî ǃkhūsib ân di ǂguib xa ra koasenn xa?

⁷Khoe-i xare-i ge ǁî-i di ǃgâsaba tātsē nî ore ǁoa; ǁî-i ge Eloba ǀûbaǁguiba-e mā ǁkhā tide.

⁸Oremarib ǁîn ǀoms dib ge a ǃgomǀgausa, tsî ǀamose ǂâu tide amaga,

⁹aiǃâb ǃoab nî ǀamose ûiga, tsî kāǁōsibab mû tidega.

¹⁰ǁÎb ra mû, gā-ain ra ǁō ǃkhaisa; ǀhûpen ra gâren tsî ǁnâuǃāoǃnâna kāǁō, tsî xūn âna nau khoena ra ǁnākhaoba ǃkhaisa.

¹¹Xawe nēs ge ǁîn ǂgaob di ǂâisa, ǁîn omgu ǀamosib kōse nîra hâ ǃkhaisa, ǁîn di hâǃkhaide ǃhaosa xu ǃhaos ǃoa, tsîs ga ǁîn di ǀonsa ǃhūgu ǃnâ koahe, ti.

¹²Xawe khoeb, ǃgôahe rab ge hâhâ tide; ǁîb ge ǀguru-i hîa ra kāǁō-i khami ī.

¹³Nē daob ân ge ǁîna gâresise nîra ǀamǂoaba tsî ǁnāti ī xawen ge ǁîn di suriba ǁîn di mîdi xa ra ǃgâibahe. Sela.

¹⁴Gūn khamin ra ǁōba ǁgaumâibahe, ǁōb ge ǁîna nîra ǃûsi, tsî ǂhanu-ain ge ǁîn ǂama nîra gao ǁgoaǁaeb ai. ǀHobas ge īsib âna nîra hapu, on ge nî hâǃkhaio.

¹⁵Xawe Elob ge ti ǀomsa ǀhobas di ǀgaiba xu nî ore; ǁîb ra ǃkhōǃoa te amaga. Sela.

¹⁶Tā ǃao re, khoeb ga ǃkhūo, ǁîb ommi di ǂkhaisib ga kaio;

¹⁷ǁîb di ǁōb ǃnâb ge nēn hoan xa ǀgui-i xare-e ūsao tide xuige, ǁîb di ǂkhaisib ge sao bi tide.

¹⁸Ûib âb ǃnâb ra ǃgâiǃgâse ūhâsen, tsîb ra koahe, ǃgâiǃgâisenni ra amaga,

¹⁹xaweb ge ǃhaos ǁîb îgu dis tawa nîra sī, ǀamosib kōse gu ge ǃnâba mû tide.

²⁰Khoeb ǃgôasib ǃnâ hâb tsî ǁnâuǃā-e ūhâ tamab, ǁîb ge ǀguru-i hîa ra kāǁō-i khami ī.