Read Khoekhoegowab Psalmdi 50 Bible Online

Psalmdi 50 - Khoekhoegowab bible

Psalmdi 50

¹ǁNaetsanas Asafi dis. Elob, elogu dib, ǃKhūb ra ǃhoa tsî ǃhūbaiba ǂgai, sores ra ǁhaisa xu, ǁîs ra ǂgâs kōse.

²Sionni îsasib di ǀoasasiba xub ra Eloba ǂkhaisase ǂhai.

³Sida Elob ge nîra hā tsî ǃnō tide; ǀaes ge ǁîb di ais aiǃâ nîra hapu tsî ǁîb ǂnamipe i ge ǀgaisase nîra ǃgom.

⁴ǁÎb ge ǀhomma ra ǂgai ǀgapise, tsî ǃhūbaib ǃoa, ǁîb di ǁaesab nî ǀgoraǃgâse:

⁵ǀHaoǀhaoba te re ǀkhomxaǂgao ta hân, ti ǃgaeǀhaosa ǁguibas ǀkha ra dīna.

⁶ǃNubai gu ge ǀhomga ǁîb di ǂhanu-aisiba nîra ǂhôa, Elob ǂûb ra ǀgoraǃgâ xui-ao. Sela.

⁷ǁNâu re, ti ǁaese, î ta ǃhoa re, Israeltse, î ta ǀhûǀguitimîba tsi re: Tita Elota ge a sa Elo, ti.

⁸Sa ǁguibadi ǃaroma ta ǀau tsi tide, sa khauǁguibadi ge hugaǀgui ti aiǃâ hâ xui-ao.

⁹ǁGōga ta ge sa omma xu ū tide, tsî ǁkhāti ta ge pirina ū tide sa ǃharade xu.

¹⁰Tin ge a ǃgarob di ǀgurun hoana, ǀoadisi ǀgoan ǃhomgu ai hân ge a ti xui-ao.

¹¹Tita ge ǃhomgu di aniǃnôan hoana a ǂan, tsî amǀnēn ǃaub din ge a ti.

¹²ǃÂ ta ka hâo xawe ta mîba tsi tide, tin a ǃhūbaib tsî ǁîba ra ǀoaǀoa xūn hoana xui-ao.

¹³ǁGōgu di ǁgan-e ǂû ta nî tita? Pirin di ǀaoba ā ta nî tita?

¹⁴Eloba gangansa ǁguiba re, îts ǁnāti Hoan xa ǀGapiba sa mîmâide matare re.

¹⁵Îts tita ǂgaiǀî re ǂōǂōsib di tsēs ai; o ta ge tita nî huiǂui tsi, tsîts ge satsa nî kare te.

¹⁶Xawe eloxoresab ǃoab ra Eloba mî: Tarexats ra satsa ti ǂnûiǂgāde ǂhôa, tsî ti ǃgaeǀhaosa sa ams ǃnâ ra ū,

¹⁷ǂgōǀauhesats ra ǁkhan hîa, tsî ti mîdets ra khaosǀî aoxū hîa?

¹⁸ǃNari-ao-ets ra mû ots ra ǁî-i ǀkha ǀgui; tsîts ra ǃgamekhôa-aon ǀkha amǃnâxa.

¹⁹Sa amsats ra ǂkhabab ǃnâ mā, tsî sa nams ra gāxaǃnâsiba ǃhû.

²⁰ǂNû tsîts ra ǃhoa sa ǃgâsab ǃoagu, sa îs di ôab ǃoaguts ra ǃkhāǃkhāmîde ǃhoa.

²¹Nē xūnats ge dī, tsî tita ge a ǃnō; ots ge ge ǂâi, tita sats ǁkhāts khami īsa. Xawe ta ge nî ǁkhara tsi, tsî nî ǁîsa sa mûǁae mâi.

²²ǁÎsa ǁnâuǃā re, sadu Eloba ra ǀurudo, î ta tā ǀkhauǃā, hui-ao-i a ǀkhai hîa.

²³Gangansa ra ǁguiba-i, ǁnā-i ge tita ra ǃgôa-e, tsî ǁî-i daoba ǃgâise ra ǁāǁā-i, ǁnā-e ta ge Elob di ǃgâiǃōba nîra mû kai.