Read Khoekhoegowab Psalmdi 51 Bible Online

Psalmdi 51 - Khoekhoegowab bible

Psalmdi 51

¹ǁNaetsanas Davib dis, ǂam ǁnae-aobab ge dības. Kēbo-aob Natanni ge ǁîb tawa sī ǃnubai, Batsebas tawab ge ǂgâ hâ is khaoǃgâ. ǀKhomxa te re, ti Elotse, sa ǀkhomxasib ǃoa; î ǀari re ti ǃûǂamde sa ǀkhomxaǂgaosigu di kaisiba ǃoa.

²ǁĀ te re ǃgâise ti dāsāde xu, î ǃanuǃanu te re ti ǁoreba xu.

³Ti ǃûǂamde ta a ǂan xuige, tsî ti ǁoreb ge hugaǀgui ti aiǃâ hâ.

⁴Sats ǀguits ǃoagu ta goro ǁore tsî sa mûǁae a ǂkhaba xūna goro dī, sats nî ǂhanu-aiga sa ǃhoas ǃnâ, tsî ǃanuts nîga sa ǀgoraǃgâs ǃnâ.

⁵Mû, dīsās ǃnâ ta ge tita ge ǃnae, tsî ǁoreb ǃnâs ge ti îsa ge ǃkhōǃoa te.

⁶Mû, sats ge turaba ūhâ ǃnāb ǃnâ hâ amab ǃnâ; tsî ǂganǃgâsib ǃnâts ra gā-aisiba ǁkhāǁkhā te.

⁷ǁOreo kai te re hisob ǀkha, î ta ǃanu; ǁā te re î ta ǃuri, tsamaros khami.

⁸Î ta ǁnâu re ǃgâiaǂgaob tsî dâb tsîkha; î gu ǁnā ǂkhōgu, sats go khôaǂkhūga dâ re.

⁹Gaugau re sa aisa ti ǁorena xu ti Elotse, î ǀari re ti dīsādi hoade.

¹⁰ǃAnu ǂgaoba kuruba te re, ti Elotse, î ǁaposa gagasa ti ǃnāb ǃnâ ǀasa kaiba te re.

¹¹Tā aoxū te re sa aisa xu, î sa ǃAnu Gagaba tita xu tā ūbē re.

¹²ǁKhawa mā te re sa ǃgâiǃōb di ǃgâiaǂgaoba, î māsenxa gagas ǀkha ǂkhâǃnâ te re.

¹³O ta ge ǃûǂam-aona sa daoga nî ǁkhāǁkhā, on ge ǁore-aona sa ǃoa nî ǃhobasen.

¹⁴ǀAob ǀhapixasiba xu ore te re Elotse, ti ǃgâiǃōdī-aotse, os ge ti namsa sa ǂhanu-aisiba dâxase nîra koa.

¹⁵ǃKhūtse, khowa re ti amǁgaukha, os ge ti amsa sa koasa nîra ǂhôa.

¹⁶Sats ge ǂāǁguibade tura tama hâ xui-ao, ǁnā tamas ka io, o ta ga mā tsi; khauǁguibadi ǃnâts ge ǃgâiǃgâibasen tama hâ.

¹⁷ǁGuibas Eloba ūǃoasabas ge a khôaǂkhūsa gaga; khôaǂkhūsa tsî ǃgamǃgamsensa ǂgaobats ge sats Elotsa ǃharaxū tide.

¹⁸ǃGâidība re Sionsa sa ǃgâiǃgâibasensa ǃoa; ǂnubikhâi re Jerusalems di ǂnubiǂgoaga.

¹⁹ǁNāǃnubaits ge ǁguibadi ǂhanu-aisib didi xa nîra ǃgâibahe, khauǁguibadi xa tsî hoaragase ra ǂhubihe ǁguibadi xa; ǁnāǃnubain ge gomaga sa altars ai nîra ǁguiba.