Read Khoekhoegowab Psalmdi 52 Bible Online

Psalmdi 52 - Khoekhoegowab bible

Psalmdi 52

¹ǁNaetsanaǂans Davib dis, ǂam ǁnae-aobab ge dības. Doegi, Edomǁîb ge hā tsî Saula ǂanǂan tsî: Davib ge Ahimelexi di ommi tawa go sī, ti ǁîb ǃoa mî ǃnubai. Tarexats ra ǂkhabab xa koasen, ǃgari-aotse? Elob di ǃgâixasib kom hoaraga tsēsa hâo.

²Sa nams ge ǂkhabab ǀguib xa ra ǂâiǂâisen; ǀāǀāhe hâ ǂkhomgôa-i axase, sats gāxaǃnâsib sîsenaotse.

³Sats ge ǂkhababa ǃgâib xa a ǀnam, ǂhumiba ǂhanu-aisiba ǃhoas xa. Sela.

⁴Sats ge ǁgaoǁgaosib di mîdi hoade a ǀnam, sats gāxaǃnâ namtse!

⁵Ob ge Eloba satsa ǁkhāti nîra hîkākā ǀamosib kōse. ǁÎb ge nîra tsububē tsi, tsî tentoms âtsa xu nîra ǂgaebē tsi; ā, ǁîb ge ûitsaman di ǃhūba xu nî ǃhomǂui tsi. Sela.

⁶On ge ǂhanu-aina ǁnāsa mû tsî nîra ǃao; on ge ǁîb ǂama âi tsî nî mî:

⁷Mû, ǁnā khoeb, Eloba ǁîb di ǁhaiǁhâǃkhaise dībasen tamab, tsî ǁîb ǃkhūsib di ǂguib ai ra ǂgomaiǂnûib, ǃkhūsib âb ǃoa ra ǁhaiǁhâba.

⁸Xawe tita ge ǃam ǀkherahai-i khami ī Elob ommi ǃnâ; tita ge Elob di ǃgâixasib ai ra ǂgomaiǂnûi, ǀamosiba xu ǀamosib kōse.

⁹Tita ge ǀamosib kōse nîra koa tsi, sats go ǁîsa dī amaga; tsî ta ge sa ǀonsa nî ǃâubasen, sa ǃanun di mûǁaes a ǃgâi amaga.