Read Khoekhoegowab Psalmdi 55 Bible Online

Psalmdi 55 - Khoekhoegowab bible

Psalmdi 55

¹ǁNaetsanaǂans Davib dis, ǂam ǁnae-aobab ge dības Neginots ǃoa. Elotse, ǁnâu-am re ti ǀgoresa, î ti ǀkhomabasensa xu tā gaugausen re;

²ǃgaoǃgâ, î ǁnâu-am te re; ti ǃgomsigu xa ta ra dāhe xuige,

³khākhoeb di dommi ǃaroma, eloxoresan di ǂōǂōsib xa. ǂHanuoǃnâsiban ra ǁguiǂam te, tsî ǁaixasib ǃnân ra ǁkhan te.

⁴Ti ǂgaob ge ti ǃnâ tsû hâ; tsî ǁōb di ǃhurib xa ta go hāǂamhe.

⁵ǃAob tsî ǀkhūb tsîkha ge ra tsâǀkhā te, tsî ǃaorosasigu ge go hāǂam te.

⁶O ta ge tita ra mî: ǁGabokha ta ga ūhâ, ǂnabu-i khami, o ta ga ǁkhanabē tsî sī sâ.

⁷Mû, ǃnūse ta ga ǁkhanabē, ǃgaroǃhūb ǃnâ ta ga hâǁgoa. Sela.

⁸ǃNoeǃnoesen ta ka, ǁhaiǁhâ ta nîse, doeǁga ra ǂoaba xu, ǀgaisa ǂoaba xu.

⁹ǁÎna hîkākā re ǃKhūtse, ǁîn di gowaba ǀgoraǃā re, ǁgaidīb tsî ǂnoagub tsîkha ta ǃās ǃnâ ra mû xuige.

¹⁰ǁÎn ge tsēa tsî tsuxuba ǁîs ǂnamipe ǁîs di ǂgoagu ai ra ǃgûma; tsî ǂkhabasib tsî tsûaǂgaob tsîkha ge ǁîs di ǃnāb ǃnâ hâ.

¹¹Hîǀhurus ǀguis ge ǃnāb âs ǃnâ hâ; tsî ǁgâiǀāb tsî gāxaǃnâsib tsîkha ge ǁîs di daoba xu ǂgō tama hâ.

¹²Khākhoe tama i ge ǁnā-i, ǃhō te ra-e, ǁnās ka io, o ta ga tani hâ; ti ǁkhanao tama i ge ǁnā-i, ti ǃoa-ai ra kaikaisen-e, ǁîs ka io, o ta ga ǁîba xu gaugausen hâ.

¹³Xawe sats ge a ǁî, ti horesats, tita khami i khoets, tsî ti ǂansabetsa,

¹⁴Sakhom ǃnurise gere ǂharugukhom, ǀhûpe Elob ommi ǃoa gere ǃgûkhoma ǂguin ǀkha.

¹⁵Ab ǁōba ǁîna hāǂam, în ûitsamase ǁō hân hâǃkhaib ǃoa ǁgôa; ǂkhabasigu ge ǁîn di hâǃkhais ǃnâ hâ, ǁîn di ǃnāb ǃnâ.

¹⁶Xawe tita ge Elob ǃoa nî ǂgai, ob ge ǃKhūba nîra ore te.

¹⁷ǃUia, ǃnauǁgoaga tsî tsēǃgâǁaeb ai ta ge nî ǃgae tsî ǃau-ā, ob ge ǁîba ti domma nîra ǁnâu.

¹⁸ǁÎb ge ti ǀomsa ǂkhîb ǃnâ ti ǃoagu hâ toroba xu ra ore, ǂguin kom ǁîn ǀkha ti ǃoagu hâo.

¹⁹Elob ge ǁnâu tsî nîra ǁîna ǃgamǃgam, ǁîb hugasa xu trons ai ǂnôaba. Sela. ǁÎn tawa i ǀkharaǀkharasen-i xare-e hâ tama tsî Eloban ǃaoǃgâ tama hâ amaga.

²⁰ǁÎb ge ǃomkha âba ǁnān, ǁîb ǀkha ǂkhîba ūhân ǃoa ge ūkhâi; ǁîb ge ǃgaeǀhaos âba ge ǀuriǀuri.

²¹ǁÎb di ams ge ǁnui-i ǃgâ-ai a ǂkhanu, xawe ǂgaob âb ge a toro; mîdi âb ge ǁnui-i xa a tsaura, xawe di ge a ǂgaeǂuihe hâ gôa.

²²Sa ǂhansende ǃKhūb ai ǁgui, ǁîb ge nîra ǂhansenba tsi xuige; ǁîb ge tātsē mā-am tide, ǂhanu-ai-i nî ǁnope ǃkhaisa.

²³Xawe sats Elots ge ǁîna nîra ǂhāǁgôa kāǁōsib di tsaus ǃnâ; khoegu ǀaob tsî gāxaǃnâsib digu ge ǁîgu tsēdi di ǃkhareb xaweba sīǃnâ tide. Xawe ta ge tita sa ai ra ǂgomaiǂnûi.