Read Khoekhoegowab Psalmdi 56 Bible Online

Psalmdi 56 - Khoekhoegowab bible

Psalmdi 56

¹ǁNaetsanas Davib dis, ǂam ǁnae-aobab ge dības Jonat Elem Rexokims ǃoa, Filisteǁîn ge Gats tawa ǃkhō bi ǃnubai. ǀKhomxa te re, ti Elotse, khoen ra dāǂkhū te xuige; hoaraga tsēsab ge ǂnoagu-aoba ra ǁgâiǀā te.

²Ti ǃkhē-aogu ge hoaraga tsēsa ra dāǂkhū te; ǂgui ǀgapiǂâixa ǂnoagu-aona ta kom ūhâo.

³ǃAo ta ka tsēs ai ta ge sa ai nî ǂgomaiǂnûi.

⁴Elob di mîsa ta nî koa; tita ge Elob ai ra mûmâinǃgâ tsî ǃao tide. Tare xū-es kha ǁgansa nî dī te?

⁵Hoaraga tsēsan ra ti mîde dawaǃkhuni; ǁîn di ǂâidi hoadi ge ti ǃoagu hâ ǂkhabadī ten nîse.

⁶ǁÎn ra ǀhûǀhao, tsîn ra ǂui, ti ǃnôaran ra ǃkhē, ti ǀomsan gere ôa-ams ǁkhās axase.

⁷ǁÎn ǂkhabasiba dīdawa-am re; ǁaede ǂnauǁgui re ǁaib ǃnâ, ti Elotse!

⁸Sats ge ti ǁhâmasa ge ǃgôakhâi; sats ge ti ǁgamrona sa xapab ǃnâ ge ǂgā. Sa ǂkhanis ǃnâ ǁîna ǀkhain a?

⁹ǁNāǃnubain ge ti khākhoena nîra oa, huiǂgai ta kara tsēs ai. Nēsa ta a ǂan, Elob tita ǀkha hâsa.

¹⁰Elob di mîsa ta nîra koa, ǃKhūb di mîsa ta nîra koa.

¹¹Tita ge Elob ai ra ǂgomaiǂnûi, tsî ta ge ǃao tama hâ. Tare-en kha khoena nî dī te?

¹²Ti Elotse, ti mîmâide ta surude tsi hâ; ganganǁguibade ta ge nî matare tsi.

¹³Sats go ti ǀomsa ǁōba xu ore xui-ao, tsî ti ǂaira ǃnôa ra nîsa xu, Elob di ais aiǃâ ta nî ûitsaman di ǃnâb ǃnâ ǃgûga.