Read Khoekhoegowab Psalmdi 62 Bible Online

Psalmdi 62 - Khoekhoegowab bible

Psalmdi 62

¹ǁNaetsanas Davib dis, ǂam ǁnae-aobab ge dības Jedutunni dommi ǃoa. Elob ǀguib ais ge ti ǀomsa ǃnōsase ra ǃâu; ǁîba xub ra hā ti ǃgâiǃōba.

²ǁÎb ǀguib ge ti ǃgareǀui tsî ti ǃgâiǃōba; ti ǁaposa hâǃkhaib a, o ta ge kaise ǁnope tide.

³Matikōse du kha sadu hoado ǀgui khoeb ǀguib ǃoagu nî tsūǂâi, sadu hoadu ra ǃgam bi ǂgao, ǁnāǁgā ra ǂnubiǂgoab khami, tsî ǁnā ra ǂnubiǂgoab khami?

⁴Nēs ǀguisan ra ǀapeǀape, matin nî ǀgapib âba xu ǂhāǁnâ bi ǃkhaisa; ǂhumigu xan ra ǃgâibahe, ǁîn di ams ǀkhan ra ǀkhae, xawe ǂgaob ân ǀkhan ra ǀâxare. Sela.

⁵Xawe sas, ti ǀomse, Elob ǀguiba ǃnōba; ǁîba xus ra ti ǃâubasensa hā xuige.

⁶ǁÎb ǀguib ge ti ǃgareǀui tsî ti ǃgâiǃōba, ti ǀgapi hâǃkhaiba; tita ge ǁnope tide.

⁷Elob ǃnâ kha ge ti ǃgâiǃōb tsî ti ǃgôasib tsîkha hâ; ti ǀgaib di ǃgareǀuib, ti ǁhaiǁhâǃkhaib ge Eloba.

⁸ǁÎb ai ǂgomaiǂnûi re mâ ǁaeb hoaba, ti khoedo; ǁhōǂui re sadu di ǂgaoba ais âb aiǃâ; Elob ge ǁhaiǁhâǃkhaise ība da. Sela.

⁹ǁAu xūn ǀguin ge khoen ôana, ǃgari-aogu ge a ǂhumi; ǀnō-ūdas ǃnâts ga ǁîna ǀnō on ge hoatsama ǁau xū-i khami a supu.

¹⁰ǁGâiǀāb ai tā ǂgomaiǂnûi re, î tā ǁkhâuǁnâxūn ai ǁause mûmâinǃgâ re; ûixūn ga kaise ǂguio, tā ǂgaoba ǁîn ai mâi re.

¹¹Elob ge ǀgui mîsa ge mî, ǀgam ǃnāra kōse ta ge ǁîsa ge ǁnâu: ǀGaib a Elob disa,

¹²tsî ǃgâixasib ge saba, ǃKhūtse. Mâ-i hoa-ets ge ǁî-i di sîsenni ǃoa ra mādawa-am xui-ao.