Read Khoekhoegowab Psalmdi 63 Bible Online

Psalmdi 63 - Khoekhoegowab bible

Psalmdi 63

¹ǁNaetsanas Davib dis, Judab di ǃgaroǃhūb ǃnâb hâ hîa. Elotse, sats ge a ti Elo, satsa ta ge ra ôa; ti ǀoms ge satsa ǁgâ hâ, ti ǁgans ge satsa ra ǁkhore ǂnâsa tsî kaise ǂnâ hâ ǃhūb, ǁgamob ǃnâ.

²ǁNāti ta ra kō tsi ǃanusib ǃnâ, tsî ta ra mû sa ǀgaib tsî sa ǃgôasib tsîkha.

³Sa ǃgâixasib ge ûib ǃgâ-ai a ǃgâi xui-ao, ti amǁgaukha ge nî kare tsi.

⁴Nēti ta ge nîra kare tsi ti ûib ǃnâ; sa ǀons ǃnâ ta ge ti ǃomkha nîra ūkhâi.

⁵Kausa xūn tsî kaise kausa ǃân xats ra ǁâ khamis ge ti ǀomsa nîra ǁâ; tsî ti ams ge dâxase ra ǁnae amǁgaugu ǀkha nîra koa tsi.

⁶Ti kharob ai ta sats xa ra ǂâi; o ta ge sa xa tsuxuǃûiǁaega ra ǂâiǂâisen.

⁷Sats ge ti huitsa xui-ao, tsî sa ǁgabokha di sommi ǃnâ ta ge dâxase nîra ǁnae.

⁸Ti ǀoms ge satsa ra ǂae-ai; sa amǀkhāb ǁôab ge ra ǂkhâǃnâ te.

⁹Xawe ǁnān, ti ǀomsa hîǀhuru si nîse ra ôan, ǁîn ge ǃnaga hâ ǃgam ǃkhaidi ǃhūbaib didi ǃnâ nîra sī.

¹⁰ǁÎn ge nîra māǁnâhe gôab di ǀgaib ǃnâ, ǀgirin di amǀnē kaihen ge nîra.

¹¹Xawe gao-aob ge Elob ǃnâ nîra ǃgâiaǂgao; mâ-i hoa-i, ǁîb tawa ra nū-i, ǁnā-i ge nîra koasen, ǂhumi-aon di ams ge nîra ǂganamhe xui-ao.