Read Khoekhoegowab Psalmdi 65 Bible Online

Psalmdi 65 - Khoekhoegowab bible

Psalmdi 65

¹ǁNaetsanas Davib dis, ams, ǂam ǁnae-aobab ge dības. Sats Elotsan ra kare Sions tawa; tsîn ra mîmâide matare tsi.

²Sats ǀgoresa ra ǁnâuts, ǃoa as ǁgans hoasa hā.

³Sida dīsādi ge ra dan da, xawe sats ge sida di ǃûǂamde ra ǀûba da.

⁴ǃGâiǃgâxa i ge ǁnā-i, sats ra ūǂuibasen tsî ra ǀgū kai-e, î-i sa ai-omgu ǃnâ ǁan ti; sida ge nîra ǁâǁâhe xūn sa ommi din ǀkha, ǃanub sa î-ommi dib ǀkha.

⁵ǃHuriǃhurisa xūnats ge satsa ǂhanu-aisib ǃnâ nîra ǃeream da, Elots, sida ǃgâiǃōb dits, ǃhūbaib ǀkhâuǀamdi hoadi di ǂgomaiǂnûits tsî ǃnūse hurib amǃgâ ǁgoen ditse.

⁶Sa ǀgaib ǀkha ǃhomga ra ǂnûiǁapoǁapots, ǀgaib ǀkha anahe hâǃâ,

⁷hurigu di ǂkhupiba ra ǃnō kaitsa, ǃgabigu âb di ǂkhupib tsî ǁaedi di ǂkhupib tsîna.

⁸Tsî ǀkhâuǀamdi ai ǁan hân ge ra ǃao, sa saodi ǃaroma; ǂoa-amdi ǁgoas tsî ǃuis tsîra didets ge satsa ra dâ kai.

⁹Sats ge ǃhūba ge sari, tsîts ge āsi bi, ots ge ǁîba kaise ra ǃkhū kai; ǃāb Elob dib ge a ǁgamxa, ǁnātits ga satsa ǁāǁāo, ots ge ǃhorob âna ra ǂhomi.

¹⁰ǃGaokhâihe hâ ǃhūb âbats ra ākhanu kai; ǃhūb âbats ra ǂhauǂhau tsî ǀapib ǀkhats ra ǁîba ǀâ kai; ǃīǂoaxa ra xūn ânats ra satsa ǀkhae.

¹¹Sats ge kuriba sa ǃgâisib ǀkha ra ǀgapa, tsî sa dāǃharodi ge ǁnuib xa ra ǂnâ.

¹²ǃGaroǃhūb di ǃû-aide xu i ge ra ǂnâ; tsî ǃhomgu ge dâb ǀkha ra ǃgaeǂnamisen.

¹³ǃÛ-aidi ge ǀgoan ǀkha anahe hâ, tsî ǃgoaǃnāgu ge ǃhorob ǀkha ǃgū-aihe hâ; khoen ra dâ tsî ǁnae.