Read Khoekhoegowab Psalmdi 66 Bible Online

Psalmdi 66 - Khoekhoegowab bible

Psalmdi 66

¹Ams, ǁnaetsanas, ǂam ǁnae-aobab ge dības. Eloba dâba re, ǃhūbaits hoatse!

²ǁNaeba re, ǃgôasib ǁîb ǀons diba; ǃgôasiba mā bi re kares âb ǃnâ.

³Mî re Elob ǃoa: Matikōse gu a ǃaoǃaosa sa sîsenga. Kaisib sa ǀgaib dib ǃaroman ge sa khākhoena nîra ǃnaga hâba tsi.

⁴Ab ǃhūbaib hoaba satsa ǀgoreǀî; îb satsa psalmǁnaeba, îb sa ǀonsa psalmǁnaeba. Sela.

⁵Hā, î du kō Elob di dīga, ǁîb ge ǃhuriǃhurisa sîsenga khoen ôan ǃnâ ra dī.

⁶ǁÎb ge huriba ǂnâsa ǃhū-i ǃnâ ge ǀkharaǀkhara, ǀnūb ǀkhan ge ǃāba ge ǃgûǃgâu. ǁNāpa da ge ǁîb ǃnâ ge ǃgâiaǂgao.

⁷ǁÎb ge ǀgaib âb ǀkha ǀamose ra gaosîsen, ǁîb di mûra ge ǁaede ra ǃûiǃgâ, în mâǃoaxana tā ǁî-aitsama ǀgapiǀgapisen. Sela.

⁸Koa re, ǁaeso, sada di Eloba, î du ǁîb koas di domma ǁnâu kai re;

⁹ǁnāb, sada di ǀomde ûib ǃnâ ra sâub, tsî sada di ǂais nî ǁnopesa mā-am tamaba.

¹⁰Sats ge ge ǃâitsâ da, Elotse; sats ge sida ge ǃanuǃanu, ǀhaiǀurib ra ǃanuǃanuhe khami.

¹¹Sats ge sida ǁnoab ǃnâ ge ǂgâ kai, sats ge ǃgom xūna sida kamanab ai ge ǃgae.

¹²Sats ge khoeba sida danadi ai ge ǃgapi kai; ǀaes tsî ǁgammi tsîra ǃnâ da ge sī ge ǂgâ, xawets ge satsa sida ge ǂgaeǂguiǂui ǃnāǂamsa khoakhoas ǃnâ.

¹³Tita ge sa ommi ǃnâ nîra ǂgâ khauǁguibadi ǀkha, tita ge ti mîmâide nîra matare tsi,

¹⁴ǁnā mîmâidi, ti amǁgaukha xu ge ǂoadi, tsî ti ams ge ǃhoaǂuide, ǂhâb ǃnâ ta hâ hîa.

¹⁵Khauǁguibadi kausa goman dide ta ge satsa nîra ǁguiba, ǀanǀansîsenni bairagu dib ǀkha; tita ge gomana pirin ǀkha ǀhûpe nîra ǁguiba. Sela.

¹⁶Hā, î du ǁnâu re, Eloba ra ǃao du hoado; î ta ǃhoaba du, tare xū-eb ge ti ǀoms tawa dī ǃkhaisa.

¹⁷Tita ge ti ams ǀkha ǁîb ǃoa ge ǂgai; tsîb ge ti nams ǀkha ge kaikaihe.

¹⁸Ti ǂgaob ǃnâ ta ga ǂkhababa ǂâibasen hâo, ob ga ǃKhūba ǃgâ tama i hâ.

¹⁹Xawe Elob ge amase ge ǁnâu, ǁîb ge ti ǀgores di domma ge ǃgâ.

²⁰Ab Eloba ǃkhōǀkhāhe re, ti ǀgoresa ǂkhā tama tsî ǀkhomxaǂgaosib âba tita xu ūdawa tamaba.