Read Khoekhoegowab Psalmdi 68 Bible Online

Psalmdi 68 - Khoekhoegowab bible

Psalmdi 68

¹ǁNaetsanas Davib dis, ams, ǂam ǁnae-aobab ge dības. Elob ra khâio, on ge khākhoen âba ra ǀgaruǀgaruhe; on ge ǁkhansaben âba ais âba xu ra ǁhâ.

²ǀAnni ra kā khamits ge ǁîna ra kā kai; ǂnuruǁnui-i ǀaes xa ra tsuni khamin ge eloxoresana Elob di ais aiǃâ ra ǀkhai.

³Xawe ǂhanu-ain ge ra ǃgâiaǂgao, ǁîn ge dâb xa ra urikhâi Elob di ais aiǃâ, tsî dâxase ra ǃgâiaǂgao.

⁴ǁNaeba re Eloba, psalmǁnaeba re ǀons âba, daoga ǁāǁāba bi re, ǁnāb, ǃgaroǃhūb ǃnâ ra ǃgapiba, ǃKhū tib ǀon hâ xuige, î du ǃgâiaǂgaob xa ais âb aiǃâ urikhâi re.

⁵ǁÎb ge ǃoaǀgôan di î, tsî ǃoataradi di ǂhanuǂhanu-aob, Eloba, ǃanu ǁanǃkhais âb ǃnâ.

⁶Elob, ǀguri hâna ommi din ǃnâ ra ǁan kaib, ǃkhōsana ǃgâiǃgâb ǃnâ ra ǂgaeǂguiǂgâba; xawe mâǃoaxan ge ǂnâsa ǃhūb ǃnâ ǁan hâ.

⁷Elotse, sa ǁaes aiǃâts ge ǃgûǂoao, ǃgaroǃhūb ǃnâts ge aimâo, Sela,

⁸ob ge ǃhūbaiba ge ǀkhū. ǁKhāti gu ge ǀhomga xu ǁgamga ge ǂnâ Elob di ais aiǃâ nē Sinaib ǂûb, Elob, Israeli Elob di ais aiǃâ.

⁹Sats ge ama ǃgâi ǀapiba ge ǀapi kai, Elotse; tsîts ge sa ǀumisa ge ǀgaiǀgaiǃnâ, tsaus geo.

¹⁰Sa ǂnubis ge ǁîs ǃnâ ge ǁan, sats ge sa ǃgâisiba xu ǀkhomǀkhomsabeba hâǃkhai-e ra ǁāǁāba, sats Elotsa.

¹¹ǃKhūb ge mîsa ra mā, ǃgâiǂhôasa ra hā-ū khoedi ge kaise a ǂgui:

¹²Gao-aogu ǂnubidi digu ge ra ǁhâ, ǁhâ ra; tsî oms tawa hâs ge ǁkhâuǁnâxūna ra ǀgoraǂui.

¹³Tsî ǀgam ǁgarakha ǀuidi dikha ǁaegu du ga ǁgoe xawe du ge ǂnabu-i di ǁgabokha khami ī, ǀhaiǀurib ǀkha ǃgū-aihe hâkha, tsî ǀûn âkha ǃhuniǀurib di ǂkhaib khami īkha.

¹⁴Hoaǀgaixab ge ǁnāpa gao-aoga ǀgaruǀgaruo, o i ge ǃgommi khami ge ǃuri Salmonǃhommi ai.

¹⁵Basanǃhommi ge Elob di ǃhomma; Basanǃhommi ge a ǃnomxa.

¹⁶Tare xū-i ǃaroma go kha ra suri, sa ǃnomxa ǃhomgo, ǁnā ǃhommi, Elob ge ǁîb di ǁanǃkhaise turaba? Ā, ǃKhūb ge ǀamosib kōse ǁîb ai nîra ǁan.

¹⁷Elob di kunidi ge ǀgam ǃnāra disiǀoadiside, ǂgui ǀoadiside; ǃKhūb ge ǁîdi ǁaegu hâ, Sinaib axase ǃanusib ǃnâ.

¹⁸Sats ge ǀgapiseb ǃoa ge ǃapa; sats ge ǃkhōsana ge ūǃgû; sats ge hōde khoen ǃnâ ge ū, ā, ǁnâumāsen ǂgao taman tsîn ge sats ǃKhū Elots tawa nî ǁan.

¹⁹Ab ǃKhūba koahe re, tsēkorobe sada ra taniba; nē Elob ǁkhāb ge a sada ǃgâiǃō. Sela.

²⁰Nē Elob ǁkhāb ge dīǀoaǀoasa ǃgâiǃōsib di Elose ība da; tsî ǃKhūb, ǃKhūb ge ǁōba xu ûiǂoa kai tsi ǁkhā.

²¹Amaseb ge Eloba khākhoen âb di danasa nîra ǂkhūǂkhū, ǀûxa danaǂkhōs ǁnāb, ǀhapidi âb ǃnâ ra ǃgûb disa.

²²ǃKhūb ra mî: Basanna xu ta ǁîna nîra ūhā; hurib di ǃgamsiba xu ta ǁîna ǁkhawa nîra ūǀkhī,

²³sa ǂaisats nî ǀaob ǃnâ dūǂgāse, tsî sa arin di nams nî ǁîba khākhoen tawa tsāse.

²⁴Elotse, sa ǃgûgan ge ge mû, ti Elob tsî gao-aob di ǃgûga ǃanusib ǃnâ.

²⁵ǁNae-aogu ge ge aiǃgû, ǁîgu khaoǃgâ ǀkhō-aogu; tsî ǁaegub ǃnâ ǃkhomǃkharurude ra ǂnau ǂkham khoede.

²⁶Koa re Eloba ǀhaohâgu ǃnâ; ǃKhūba sadu Israeli ǀaus dido.

²⁷ǁNāpab hâ Benjaminni, ǂkhammi ǁîn ǂama ge gaob, gaosagu Judab digu ǀhûs âgu ǀkha, Sebulonni di gaosagu tsî Naftalib di gaosagu tsîna.

²⁸Elotse, ǀgaib âtsa ǁgau; ǀgaiǀgai re, Elotse, sida tawats ge sîsen sîsenna.

²⁹Jerusalems tawa hâ tempeli âts ǃaromats ge gao-aogu xa ǀkhaexūna nîra ūhābahe.

³⁰ǀAu re ǂāb di ǀgurun, ǁnā ǀhûs ǁgōgu dis ǁaedi di tsâun ǀkha, tsî ǁnāb, ǀhaiǀurib di ǃâdi ǀkha ra ǁnāǁgoeba; ǁîb ge ǁaede ra ǀgaruǀgaru, toroga ǀnam hâde.

³¹Gao-aosi sîsabegu ge Egipteba xu nîra hā; Etiopiab ge ǃhaese ǃomgu âba Elobǀî nîra ǀhōǂui.

³²Gaosigo ǃhūbaib digo, Eloba ǁnaeba re, ǃKhūba psalmǁnaeba re. Sela.

³³ǁNāb, ǀhomgu di ǀhommi ǃnâ ra ǃgapiba, hugasa xu; mû, ǁîb ge dommi âba ra ǁnâu kai, ǁnā ǀgaisa dommi âba.

³⁴Eloba ǁkhāsiba mā re, kaisib âb ge Israeli ǂamai hâ, tsî ǀgaib âba ǀnanudi ǃnâ.

³⁵ǃHuriǃhurisats a sats Elotsa, sa ǃanusiga xu; Israeli Elob ge ǁaesa ǀgaib tsî ǁkhāsib tsîkha ra mā. Ab Eloba koahe re!