Read Khoekhoegowab Psalmdi 69 Bible Online

Psalmdi 69 - Khoekhoegowab bible

Psalmdi 69

¹ǁNaetsanas Davib dis, ǂam ǁnae-aobab ge dības, Sosanims ǃoa. Ore te re, ti Elotse, ǁgammi ge ǀoms kōse go sī xuige.

²Tita ge ǃhūo ǂgoab ǃnâ ra domǂgâ, khoe-i mâ ǁoa ǃkhais ǃnâ. ǃGam ǁgamgu ǃnâ ta ge go sī; tsî ǁgammi xa ta ge ra dâuǂamhe.

³Tita ge ǂgais xa ǀhupu hâ ta; ti dommi ge ra ǂan, ti mûra ge ǀhai hâ, ti Eloba ta ra ǃâu hîa.

⁴ǀHapiǃkhai-i ose ra ǁkhan ten, ge ti danaǀûn ǃgâ-ai a ǂgui; hîǀhuru te nîse ra ôa-am ten, ǂkhabaxūn ǃaroma khākhoese ība ten ge go ǀgaisa. ǃNariǀhana tama ta hân, ǁîna ta ge koma nî mādawa-am.

⁵Elotse, sats ge ti gâresib xa a ǂan; tsî ti ǀhapidi ge sa aiǃâ ǂganǃgâsa tama hâ.

⁶Tita xu an tā taotaohe satsa ra ǃâuna, ǃKhūtse, ǂnubidi di ǃKhūtse; an tita ǃnâ tā tao kaihe satsa ra ôana, Israeli di Elotse.

⁷Sats ǃaroma ta ge ǃharaxūba ra tani xuige, taob ge ti aisa ra ǃgū-ai.

⁸Tita ge ti ǃgâsaga ǃhaokhoese ība, ti îs di ôana ta ge ǀūhesa khoese ība.

⁹Ôasasib sa ommi dib ge go hapu te xui-ao, tsî ǃharaxūdi satsa ra ǃharaxūn didi ge go ǁnā-ai te.

¹⁰Tsî ta ge ra ā ti ǀoms di ǂûtama hâs ǃnâ, xawes ge nēsa ge ǃharaxū kaiba te.

¹¹Tsî ta ǁhōsa sarase go ana, xawe ta ge ǁîna go ǂkhoamî kaiba.

¹²Dao-ams ǃnâ ǂnôan, ge tita xa ra ǃhoa, tsî ta ge tita ǀgaisa xûiba ra ān di ǃhōǁnae-am kai hâ.

¹³Xawe tita ge ra ǀgore sats ǃKhūts ǃoa, ǀkhommi di ǁaeb ǃnâ; ti Elotse, kaisib sa ǀkhomxaǂgaosib diba ǃoa ǁnâu-am te re, îǂhôasib sa ǃgâiǃōb diba ǃoa.

¹⁴ǂGoaba xu huiǂui te re, îts tā ǂgâ kai te re; î ta orehe re ti ǁkhansabena xu, tsî ǁgamgu di ǃgamsiba xu.

¹⁵A gu ǁgamga tā dâuǂam te re, îb ǃgamsiba tā hapu te re, îs tsaus di amsa ti ǂamai tā ǂganamsen re.

¹⁶ǁNâu-am te re ǃKhūtse, sa ǀkhomxaǂgaosib a ǃgâi xuige; kaisib sa ǀkhomxaǃnâsigu dib ǃoa kōǀî te re.

¹⁷Î sa aisa tā gaugau re sa ǃgāba xu, ǀhū ta ra xuige, ǃhaese ǁnâu-am te re.

¹⁸Ti ǀomsa ǃoa ǀgūǀgūsen î ore si re; ti khākhoen ǃaroma ore te re.

¹⁹Sats ge a ǂan ti ǃharaxūb, ti taob tsî ti ǃhōhes tsîna; ti ǂōǂō-aon hoan ge sa aiǃâ hâ.

²⁰ǃHaraxūb ge ti ǂgaoba go khôa tsî ta ge ǂkhabu hâ; tsî ta ge ǀkhomxaǂgaosiba go ǃâubasen xaweb a ǀkhai, tsî ǁkhaeǂgao-aona, xawe ta ge ǁîna hō tama hâ.

²¹Ā, tsababan ge go ǂûmā te, tsî ǁgâ ta hâ hîan ge ǀkhuruxûiba go āsi te.

²²Ab ǁîn di tāba ais ân aiǃâ ǀûis ase ī; tsî ǂâioǃnân aiǃâ ab ǁnoab ase ī.

²³A di mûdi âna ǃkhae, în tā mû, î gu kamanagu âna hugaǀgui ǁnope.

²⁴Sa ǁgôasiba ǁîn ǂama ǁhōǂui; îb sa ǁaib di ǀgamsiba ǁîna tsâǀkhā.

²⁵As ǁanǃkhais âna ǀkhaiǃnâ; ǁanao-e a-i tā omdi ân ǃnâ hâ.

²⁶ǁÎn ge ra ǃgôaǃgon sats xa ǂnauhe hâ khoe-e, tsîn ge sats xa ǀhapiǂnûihe hân di tsûb xa ra ǃhoa.

²⁷Dīǀaro ǀnî dīsāsa dīsās ân tawa; în sa ǂhanu-aisib tawa tā sī.

²⁸An ûib di ǂkhanisa xu ǀariǂuihe, în ǂhanu-ain ǀkha tā xoamâihe.

²⁹Xawe tita ge a ǀkhomǀkhomsa tsî tsūǀkhāxa; sa ǃgâiǃōba, ti Elotse, ab ǀgapi hâǃkhais ǃnâ ǂnûi te re.

³⁰Tita ge Elob ǀonsa ǁnaetsanas ǀkha nîra kare, tsî gangans ǀkha nîra kaikai bi.

³¹ǁÎs ge ǃKhūba goma-i ǃgâ-ai nî ǃgâiba, ǁnâgu tsî ǃūgu tsîna ūhâ ǁgōb ǃgâ-ai.

³²Tsamtsiǃnân ǁîsa ra mûn ge nîra ǃgâiaǂgao tsî sadu Eloba ra ôado, ab sadu di ǂgaoba ûi re!

³³ǃKhūb ge ǂhâb ǃnâ hâna ra ǁnâu tsîb ge ǁîb ǃkhōsana ǃharaxū tama hâ amaga.

³⁴An ǀhommi tsî ǃhūbaib tsîkha, hurigu tsî ǁîgu ǃnâ ra gon xūn hoana, ǁîba kare.

³⁵Elob ge Sionsa ore tsî Judab di ǃāde nîra ǂnubi xuige. ǁNāpan ge ǁîna ǁan tsî ǁîde ǀumixūse nîra ūhâ.

³⁶Tsî ǁîb ǃgāgu di surib ge ǁîde nîra ǀumi, tsî ǀons âba ǀnam hân ge ǁîdi ǃnâ nîra ǁan.