Read Khoekhoegowab Psalmdi 71 Bible Online

Psalmdi 71 - Khoekhoegowab bible

Psalmdi 71

¹Sats ǃKhūts ai ta ra ǂgomaiǂnûi; a ta tā taotaohe re, ǀamosib kōse.

²Sa ǂhanu-aisiba xu hui te, î ore te re; sa ǂgaesa ǂō re tiǀî, î ore te re.

³ǃGareǀuise ība te re, ǁîb ǃnâ ta nî ǁanse tsî hugaǀgui ta nî ǁîb ǃnâ ǂgâse; sats ge mîmāsa go mā, orehe ta nîga. Sats ge a ti ǃgareǀui, tsî ti ǁaposa hâǃkhai.

⁴Ti Elotse, ore te re eloxoresab di ǃomǁaeba xu, ǁnāb, ǂkhabase ra dīb tsî khūkhūsen rab di ǃomǁaeba xu.

⁵Sats ge ti ǃâubasentsa, ǃKhūtse, ǃKhūtse, ti ǂgomaiǂnûits ge satsa ti ǂkhamsisa xu xuige.

⁶Sa ai ta ge ge ǃgâsen hâ i ǁgûs di ǃnāba xu; ǁgûs di tîǂamsa xuts ge a ti huiǂui-ao, ti koas ge hugaǀgui sats xa hâ.

⁷Tita ge ǂguina buru-i xase ge ība, xawe sats ge ti ǀgaisa ǁhaiǁhâǃkhaitsa.

⁸As ti amsa sa koas xa ǀoa re, hoaraga tsēsa sa ǂkhaisib xa.

⁹Tā aoxū te re kairasis di ǁaeb ǃnâ; tā ǁnāxū te re, ti ǀgaib ra toaxū te hîa.

¹⁰Ti khākhoen ge tita xa ra ǃhoa tsî ti ǀomsa ra ôa-amn ge ra ǀapeǀhao xuige,

¹¹mî raǃâ: Elob kom go ǁnāxū bio, ǃgôaǃgon î ǃkhō bi re, ore-ao-i a ǀkhai xuige.

¹²Elotse, tā ǃnūse hâxū te re; ti Elotse, ǃhaeǃhaesen î hui te re.

¹³An taotaohe re, an hapuhe re ti ǀomsa ǁkhan hâna; an ǃharaxūb tsî taob tsîkha ǀkha ǃgū-aihe re ti tsūǃōba ra ôana.

¹⁴Xawe tita ge hugaǀgui ǃâubasen tsî sa koas hoasa nî ǂguiǂgui.

¹⁵Ti ams ge sa ǂhanu-aisiba nîra ǃhoa, hoaraga tsēsa sa ǃgâiǃōba, ǃgôa ǁoa ta a ǁîna xawe.

¹⁶Tita ge nîra ǃgû ǁkhāsigu ǃKhūb, ǃKhūb digu ǃnâ; ǂhôa ta nîra sa ǂhanu-aisiba, sab ǀguiba.

¹⁷Elotse, sats ge ti ǂkhamsisa xu ge ǁkhāǁkhā te, o ta ge nēsis kōse sa buruxana ra ǂhôa.

¹⁸ǁNā-amaga ǁkhāti kairasib tsî ǀhaidanasib tsîkha hâ hîa tā ǁnāxū te re, Elotse, nē ǃhaosa ta sa buruxa dīna nîra ǂhôas kōse, surib hoaba ǀgaib âtsa.

¹⁹ǁKhātib ge sa ǂhanu-aisiba, Elotse, ǀgapiseb kōse ra sī, sats, kai dīga ge dīts, Elotse, tari-e sats khami ī?

²⁰Sats, ǂgui ǂōǂōsigu tsî tsūǃōgu tsîga ge mû kai tets ge tita ǁkhawa ûi-ûi, tsî nîra ūǃapa ǃhūb di ǃgamsiga xu.

²¹Sats ge ti kaisiba nîra ǃnāǃnā, tsî hoaragase nîra ǁkhaeǂgao te.

²²ǁKhāti ta ge ǀganaǀkhōxūs, harps ti ra ǂgaihes ǀkha sa îǂhôasiba nîra koa, ti Elotse; ǁnaeba tsi ta nîra siters ǀkha, Israeli di ǃAnutse.

²³Ti amǁgaukha ge nîra dâ, psalmǁnaeba tsi ta nîra ǃnubai tsî ti ǀoms, sats ge oresa.

²⁴ǁKhātis ge ti namsa sa ǂhanu-aisib xa hoaraga tsēsa nîra ǃhoa, taon hâ, taob xan dāhe hâ, ǁîn ti tsūǃōba ra ôana xui-ao.