Read Khoekhoegowab Psalmdi 72 Bible Online

Psalmdi 72 - Khoekhoegowab bible

Psalmdi 72

¹ǁNaetsanas Salomob dis. Elotse, gao-aoba mā re sa ǂhanuba tsî gao-aob ôaba sa ǂhanu-aisiba.

²Ob ge sa ǁaesa ǂhanu-aisib ǀkha nîra ǀgoraǃgâ, tsî sa ǀkhomǀkhomsabena ǂhanub ǀkha.

³ǃHomgu ge ǁaesa ǂkhîba nîra ūǀkhība, tsî ǃnomga ǂhanu-aisib ǀkha.

⁴ǁÎb ge ǁaes di ǀkhomǀkhomsabena nî ǂhanuǂhanu, ǁîb ge ǂhâb ǃnâ hân di ôana ore, tsî ǁgâiǀā-aoba nîra ǂkhūǂkhū.

⁵ǁÎn ge satsa nîra ǃao, sores tsî ǁkhâb tsîra hâs kōse, ǃhaosa xu ǃhaos kōse.

⁶ǁÎb ge ǀapib ra ǀgâb ǃaub dib ai hā khami nîra ǁgôaxa, ǀgaisa ǀapib ǃhūba ra ǀâǀâ khami.

⁷ǁÎb di tsēdi ǃnâb ge ǂhanu-aiba nîra ǀomkhâi; tsî ǂkhîb di ǂguisib tsîna ǁkhâb nî bēs kōse.

⁸Tsîb ge ǁîba nîra gaosîsen huriba xu hurib kōse, tsî ǃĀba xu ǃhūbaib di ǀkhâuǀamdi kōse.

⁹ǁÎb di ais aiǃân ge ǃgaroǃhūb ǃnâ ǁan hâna nîra ǃhonǁgoa, tsî khākhoen âb ge tsaraba nîra tsā.

¹⁰Gao-aogu Tarsib digu tsî ǃnāǃnuidi tsîdi digu ge ǀkhaexūna nîra ūhā; gao-aogu Arabiab tsî Sebab tsîkha digu ge ǃnarexūna nîra mā.

¹¹Ā, gao-aogu hoagu ge ǁîb aiǃâ nîra ǃhonǁgoa, ǃhaodi hoadi ge ǁîba nîra ǃoaba.

¹²ǂHâb ǃnâ hâ-i hîa ra ǂgai-i, tsî ǀkhomǀkhomsabe-i hîa hui-ao-e ūhâ tama-i, ǁî-eb nîra ore xui-ao.

¹³ǁÎb ge ǀgâsa tsî ǂhâb ǃnâ hâ-e sâu, tsî ǂhâb ǃnâ hân di ǀomdeb ge nîra ore.

¹⁴Gāxaǃnâsib tsî ǁgâiǀāb tsîkha xub ge ǀomdi âna nîra ore, tsî ǀaob ân ge ǁîb di mûǁae nîra ǀgapiǃgôasa.

¹⁵Tsîb ge ǁîba ǀamose nîra ûi! Tsî khoen ge ǁîba Sebab di ǃhuniǀurib xa nîra mā. Tsîn ge hugaǀgui ǁîba nîra ǀgoreba; hoaraga tsēsab ge nîra ǀkhaehe.

¹⁶Tsî i ge ǃhūb ǃnâ ǃnāǂamsi-e nîra hâ, ǃhorob di-e, ǃhomgu di ǀamdi ai; ǁîb di ǂûtanib ge Libanonni khami nîra ī; tsî ǃās din ge ǃhūb di ǁhaob khami nîra ǀom.

¹⁷ǀOns âb ge ǀamosib kōse nîra hâ; sores hâs kōses ge ǀons âba nîra aiǃgû. Tsîn ge ǁîb ǃnâ nîra ǀkhaehe, ǃhaodi hoadi ge ǁîba nîra kare.

¹⁸Ab karehe ǃKhūb Elob, Israeli di Elob, ǀguise buruxana ra dība.

¹⁹Îs ǀons ǂkhaisib âb disa koahe ǀamosib kōse; îb ǃhūbaib hoaba ǁîb di ǂkhaisib ǀkha ǀoaǀoahe re. Amen, Amen.

²⁰ǀGoredi Davib, Isaib ôab didi ge nēpa go ǀuni.