Read Khoekhoegowab Psalmdi 73 Bible Online

Psalmdi 73 - Khoekhoegowab bible

Psalmdi 73

¹ǁNaetsanas Asafi dis. Ama ǃgâib ge Israelǁîn di Eloba ǃanu ǂgaoba ūhân tawa.

²Xawe ti ǂaira ge ge ǃnôa ǁga; ti dāǃharodi ge ge dāsā ǁga.

³Gâre khoena ta ge suri amaga, eloxoresan di ǃgâiǃgâba ta ge mûo.

⁴ǁÎn ge tsû-i xare-e ūhâ tama hâ, tsî ǁîn ge kausa tsî a ǂuru.

⁵ǁÎn ge nau khoen khami tsūb xa ǃkhōhe tama, tsîn ge nau khoen khami ǁnorahe tama hâ.

⁶ǁNā-amagab ge ǂnīsasiba ǁîna kara-i ase ra hâǂnamipe; tsūdīb ge anaxū-i axase ǁîna ra anaǂgā.

⁷ǁÎn di mûdi ge kaub xa ra ǂoaxa; ǂgaob ân di ǂâidi ge ra īǂam.

⁸ǁÎn ge khoena ra ǃhō, ǂkhabase ǁgâiǀāb xa ra ǃhoaǃâ; ǁîn ge ǃharaxūb ǀkha ra ǃhoa.

⁹ǁÎn di amsan ge ǀhommi ǃoagu ra ǂnûi, tsî nams ân ge ǃhūbaib ai ra ǃgûma.

¹⁰ǁNā-amagas ge ǁîb di ǁaesa ǁnāǀî ra ǂnan, ǀoasases ǁgam-e ra ā ǃkhaisǀî.

¹¹Tsîn ra mî: Matib kha Eloba nî ǂan? Tsî matis kha ǂansa nî hâ Hoan xa ǀGapib tawa?

¹²Mû, nētin ge eloxoresana ī xawen ge ra sâ ǃhūbaib ai, tsî ra ǃkhū.

¹³O ta ge tita ǁause ti ǂgaoba ge ǃanuǃanu, tsî ti ǃomkha ǀhapiosib ǃnâ ge ǁā.

¹⁴Hoaraga tsēsa ta kom ra ǁnoraheo, tsî ti ǁkharab kom mâ ǁgoas hoasa ra hāo.

¹⁵Mî ta kao: Tita ge ǁkhāti ǁnāti nî ǃhoa, mû, o ta ga sa ôan di ǃhaosa ǀhôagaose sîsenū hâ.

¹⁶O ta ge ge ǂâiǂâisen, ǁîsa ta nî ǁnâuǃāse, xawes ge tsū ge i ti mûǁae,

¹⁷Elob di ǃanusigu ǃnâ ta ge ǂgâ tsî ǁîn di ǀamsa ta ge kōs kōse.

¹⁸Sats kom ǁîna ǂkhanu ǃkhaidi ai ra ǂnûio; sats kom ǁîna ra ǂkhū kaio.

¹⁹Matin ǀgui mûsǀapirob ǃnâ hîkākāhe, tsî ra ǀuni, tsî ǃhurib ǀkha ra ǀamǂoa!

²⁰ǁHapo-i khami ǃnoaǂkhaits go-o, sats ga ǃnoaǂkhaio, ǃKhūtse, ots ge īb âna ra ǃharaxū.

²¹Ti ǂgaob ge au-ausen tsî ti ǃnaira ǃnâ ta ge ǃkhāhe

²²ǃnubai ta ge ǁnâuǃāoǃnâ ge i, tsî xū-i xare-e ǂan tama ge hâ i; ǀguru-i khami ta ge ī i sa tawa.

²³Xawe ta ge hugaǀgui sa tawa nî hâ; ti amǀkhāb ǃommi aits ge ǃkhō te hâ.

²⁴Sats ge nîra ǂgaeǂgui te sa ǀape-aisa ǃoa, tsî ǁnās khaoǃgâts ge ǂkhaisib ǃnâ nîra ūǃapa te.

²⁵Tari-e ta sa xōǀkhā ǀhommi ǃnâ ūhâ? Sa xōǀkhā ta xū-i xare-e tura tama ǃhūbaib ai.

²⁶Ti ǁgans tsî ti ǂgaob tsîra ga tsanaǁkhui xawe Elob ge a ti ǂgaob di ǃgareǀui, tsî ti amǃnâ ǀamosib kōse.

²⁷Kō re, satsa xu ǃnūse hân, ge nîra kā; sats ra hîkākā satsa xu ra ǀaiǁgôan hoana.

²⁸Xawe tita xa, ǃgâiba te a Elob tawa ǀgūse hâsa. Tita ge ǃKhūb, ǃKhūb ai ra ǂgomaiǂnûi, sa sîsengu hoaga ta nî ǂhôaga.