Read Khoekhoegowab Psalmdi 74 Bible Online

Psalmdi 74 - Khoekhoegowab bible

Psalmdi 74

¹ǁNaetsanaǂans Asafi dis. Elotse, tare xū-i ǃaromats kha ǀamose ra ǂhāxu da? Tare xū-i ǃaromab kha sa ǁaiba nî ǀan sa ǃû-aib di gūn ǃoagu?

²ǂÂi re sa ǀhaohâb xa, hugasa xuts ǃkhōǂuibasen hâba; sa ǀumi-amǃnâs xa, sats ore hâsa; Sionǃhommi xa, ǁîb aits ge ǁan hâ iba.

³Ūkhâi re sa ǂaira ǀamo hîǀhurusigu ǃoa, khākhoeb ge ǃanusib ǃnâ hoa xūna ge hîǀhuru.

⁴Sa mâǃoasaben ge sa ǀhûǃkhaidi ǃnâ ge ǃgō; ǁîn ge saodi âna saose ge ǂnûi.

⁵Mâ-i hoa-i ân ge ǀgui-i, ǃōsa ǀgom haixaǃkhais ǃnâ ra sîsenū-i khami ī.

⁶ǁNātin ge nēsi ǁîb di ǁhāǂgāsîsengu hoaga ǃōs tsî hamers tsîra ǀkha ge ǂkhūǂkhū.

⁷ǁÎn ge sa ǃanusiga ge ǂhubi; ǃhūb kōsen ge sa ǀons di ǁanǃkhaisa ge ǀuriǀuri.

⁸Nētin ra ǂgaob ân ǃnâ mî xui-ao: A da hoatsama hîkākā, a da ǀhûǃkhaidi Elob didi hoade khauǃkhū.

⁹Sida di saode da ge mû tama hâ; kēbo-ao-i ge a ǀkhai, tsî khoe-i xare-i ge sida ǃnâ a ǀkhai, matikōse i nî ī ǃkhaisa a ǂan-e.

¹⁰Mâ ǁaeb kōseb kha, Elotse, mâǃoasabeba nî ǃkhāǃkhā? ǃHaraxūb kha nî khākhoeba sa ǀonsa ǀamosib kōse?

¹¹Tare xū-i ǃaromats kha sa ǃomma, ā, sa amǀkhāb ǃomma ra ǂgae-oa. Ūǂui bi sa ǁkhaiba xu, î hîkākā!

¹²Xawe Elob ge a ti Gao-ao, hugasa xu; oresa ra dība ǃhūbaib ai.

¹³Sats ge sa ǀgaib ǀkha huriba ge ǃkhāǃā; sats ge drakgu di danaga ǁgamgu ai ge khôaǂkhū.

¹⁴Sats ge Leviatanni di danaga ge ǂkhūǂkhū, sats ge ǃgaroǃhūb di ǁaesa ǁîba ǂûheb nîse ge mā.

¹⁵Sats ge ǀaus tsî ǃāb tsîra ge ǀgoraǃā; sats ge ǀgaisa ǃāga ge ǂnâ kai.

¹⁶Sa as ge tsēsa, tsî tsuxub ge ǁkhāti a sa; sats ge ǀhommi di ǃnân tsî sores tsîna ge dī.

¹⁷Sats ge ǃhūbaib di ǀkharigu hoaga ge ǂnûi; soreb tsî saob tsîkha, ǁîkhats ge satsa ge kuru.

¹⁸Nēs xa ǂâi re: Khākhoeb ge ǃKhūba ge ǃhō, tsî gâre ǁaes ge sa ǀonsa ge ǃkhāǃkhā.

¹⁹ǀGuruna tā sa ǂnais di ǀomsa māǁnâ re; î sa ǀkhomǀkhomsaben di ûiba tā ǀuru re ǀamosib kōse.

²⁰ǃGaeǀhaos xa ǂâi re, ǃhūb di ǃkhae ǃkhaidi ge ǁgâiǀāb di dīgu xa ǀoa hâ xuige.

²¹ǁGâiǀāhe hâ-e a-i tā taob xa oa; a-i ǀkhomǀkhomsabe-i tsî ǂhâb ǃnâ hâ-e sa ǀonsa koa.

²²Khâimâ re, Elotse, sa ǃkhaisa ǂnoaguba re; ǂâi re ǁnā ǃharaxūb xa, ǁîb ǀkhab gâreba hoaraga tsēsa ra ǃharaxū tsiba.

²³Tā ǀuru re ǂgais sa mâǃoasaben disa, ǂkhupib sa ǃoagu ra khâiman dib, hugaǀgui ra ǃapaba.