Read Khoekhoegowab Psalmdi 75 Bible Online

Psalmdi 75 - Khoekhoegowab bible

Psalmdi 75

¹ǂAm ǁnae-aoba ge dībahes, Altasets ǃoa, ǁnaetsanas, ams Asafi dis. Sida ge satsa ra ǃkhōǀkhā, Elotse, koa tsi da ra sa ǀons a ǀgū ǃkhaisa; sa buruxa dīn ra ǃhoahe.

²Mîmâisa ǁaeb ga hāo, o ta ge ǂhanuse nîra ǀgoraǃgâ.

³ǃHūbaib tsî ǁîb ǃnâ ǁan hân hoan ga ǁnope; xawe tita ge ǂkhâǃnâhaigu âba ge mâiǁapoǁapo. Sela.

⁴Tita ge ǃkhausana ǃoa: Tā ǃkhauǃkhausen! ti ge mî tsî eloxoresana ǃoa: ǁNâba tā ǃkhōkhâi!

⁵ǀGapiseb ǃoa sadu di ǁnâba tā ǁnātikōse ǃkhōkhâi; î du tā ǂnîǃaoxase ǃhoa.

⁶ǀGapiǀgapis ge aiǂoasa xu tsî huriǂoasa xu hâ tama, tsî ǁkhāti ǃgaroǃhūba xu,

⁷xawe Elob ge a ǂhanuǂhanu-ao: ǁÎb ge nē khoeba ra ǃgamǃgam, tsîb ra nauba ǀgapiǀgapi.

⁸ǃKhūb di ǃomǁae i ge āǀgabi-e hâ, tsî ǂauxûib ra goa, habaguhe hâ xûib xa ǀoa hâse; tsîb ge ǁîba xu ra ǂnâ, tsî eloxoresan ǃhūbaib din hoan ge ǂgomaba nîra ā.

⁹Tsî tita ge ǀamosib kōse nîra ǂhôa; tita ge Elob Jakob diba nîra psalmǁnaeba.

¹⁰Tsî ta ge ǂkhabagu di ǁnâgu hoaga nîra ǁhāǁnâ, ǁnâgu ǂhanu-ain digu ge nîra ǀgapiǀgapihe.