Read Khoekhoegowab Psalmdi 77 Bible Online

Psalmdi 77 - Khoekhoegowab bible

Psalmdi 77

¹ǁNaetsanas Asafi dis, ǂam ǁnae-aobab ge dības, Jedutunni dommi ǃoa. Ti dommi ǀkha ta ge Elob ǃoa ra ǂgai; dommi âtab ge Elob ǃoa hâ, ǁnâu-am teb nîga.

²Ti ǀhūb di tsēs ai ta ge ǃKhūba ra ôa; ti ǃommi ge tsuxuba ǀhōǂuihe hâ, tsau tama hâ; ti ǀoms ge ǁkhaeǂgaohesa ra ǂkhā.

³Elob xa ta ra ǂâio, o ta ge ra sâoǃnâ kaihe; ǂâiǂâisen ta rao, os ge ti gagasa ra tsau. Sela.

⁴Sats ge ti mûra ǂkhaikari ra hâ kai; tita ge ǃhuri hâ tsî ta a khom ǁoa.

⁵Tita ge hugakam tsēdi xa ra ǂâi, ǀnaikam kurigu xa;

⁶tita ge tsuxub ǃnâ ti ǀkhō-ais xa ra ǂâi, ti ǂgaob ge ra ǂâiǂâisen tsî ti gagas ge ra ôaǃnâ:

⁷ǀAmosib kōseb kha ǃKhūba nî ǂhāxu tsî ǃaruǀî ǀkhomxa tide?

⁸ǀÛǃarib kha hâ ǀkhomxaǂgaosib âba? Kāǃaris kha hâ mîmâisa ǃhaosa xu ǃhaos kōse?

⁹ǀKhomxaǃnâsa ǀuru sib kha hâ Eloba? Tsî ǀkhomxaǂgaosib âbab kha ǁaib ǃnâ ǂganam hâ. Sela.

¹⁰ǃNubai ta ge ge mî: Ti tsûaǂgaob ge nēba; xawe Hoan xa ǀGapib di amǀkhāb ǃommi ge ǁî ǃkhaisa ra ǀkharaǀkhara.

¹¹Tita ge ǃKhūb di dīgu xa ra ǂâi; ā, ǂâi ta nîra sa buruxa dīn xa hugasa xu.

¹²Tsî ta ge sa sîsengu hoagu xa ra ǂâiǂâisen tsî sa dīgu xa nîra ǃhoa.

¹³Elotse, sa daob ge ǃanusib ǃnâ hâ; mapa i kha Elob khami ī kai elo-e hâ?

¹⁴Sats ge ǁnā Elotsa, buruxana ra dītsa; sats ge sa ǀgaiba ǁaedi ǃnâ ge ǂanǂan.

¹⁵Sats ge sa ǁaesa sa ǁôab ǀkha ge ore, Jakob tsî Joseb tsîkha di ôana. Sela.

¹⁶ǁGamgu ge sats Elotsa ge mû, ǁgamgu ge satsa mû tsî ge ǀkhū; ǃgam ǃkhaidi on ge ge gongonhe.

¹⁷ǀNanudi ge ǁgamma ge ǁhōǂui, ǀhomma xub ge ǃguruba ge hā; sa ǂāgu on ge ge ǁkhâusīhe.

¹⁸Sa ǃgurub ge ge ǃguruǂnamipe, napagu ge ǃhūbaiba ge ǃnâǃnâ; ǃhūbaib ge ǂgūbi tsî ge ǀkhū.

¹⁹Sa daob ge hurib ǃnâ ge ǁgoe tsî sa ǃganna kai ǁgamgu ǃnâ, tsî sa dāǃharodi ge ǂansa tama ge hâ i.

²⁰Sats ge sa ǁaesa gūn khami ge ǂgaeǂgui, Moseb tsî Aronni tsîkha di ǃommi ǀkha.