Read Khoekhoegowab Psalmdi 78 Bible Online

Psalmdi 78 - Khoekhoegowab bible

Psalmdi 78

¹ǁNaetsanaǂans Asafi dis. ǁNâu re, ti ǁaese, ti ǁkhāǁkhāsa; ǂō re sadu di ǂgaesa ti ams di mîdiǀî.

²Tita ge ti amsa ra khowa ǂgao ǂkhoamîdi ǃnâ, tita ge ǂganǃgâsina ra ǂhôa ǂgao hugakam ǁaeb din,

³ǁnâu tsî da a ǂann, sada îgu ge ǃhoaba dana.

⁴ǁÎna da ge ǁîgu di ôana ǃkhōdawaba tide; ǃgoaxa ǃhaosa da ǂhôa ǃKhūb di ǃkhōǀkhāxūn tsî ǁkhāsib âb, tsî buruxan, dīb gen tsîna.

⁵ǁÎb ge ǀhûǀguitimî-e ge ǂnûikhâi Jakob ǃnâ, tsîb ge ǂhanuba ge ǂnûiǂgā Israeli ǃnâ, sada îga ge mîmāba, ǁîgu di ôana gu nî ǁkhāǁkhā bi, ti,

⁶ǃgoaxa ǃhaos nî ǁîba ǂanga, ǀgôan hîa nîra ǃnaena, în ga khâi tsî ǀgôan âna ǁîb xa ǃhoaba ti.

⁷În ga Elob ai ǂgomaiǂnûi, în ga Elob dīga tā ǀuru, în ga mîmādi âba ǃkhōǀgaipe ti.

⁸În ga tā ǁîn în khami ī ti. ǁNā ǃhao-i ǃnâudana tsî mâǃoaxa ge i-i, ǁnā ǃhao-i, ǂgaob âna ge ǁāǁā ǂgao tama i-i, tsî gagas ân Eloba îǂhôase ge ība tama hâ i-e.

⁹Efraimmi di ôagu hîa ǁâtanin ǁkhâu-aogu ge ǂnoagub di tsēs ai ge oadawasen;

¹⁰ǁîn ge Elob di ǃgaeǀhaosa ǃkhōǀgaipe tama ge hâ i, tsîn ge ge ǂkhā ǂhanub âb ǃnâ ǃgûsa.

¹¹Tsîn ge ǁîb di dīga ge ǀuru, tsî ǁîb di buruxan, ǁînab ge mû kaina.

¹²ǁÎn îgu aiǃâb ge buruxana ge dī, Egipteǃhūb ǃnâ, Soans di ǃaub ǃnâ.

¹³ǁÎb ge huriba ǀgoraǃā tsî ǁîna ge ǃgûǃganu kai; tsîb ge ǁgamma ǂnubiǂgoa-i khami ge mâ kai.

¹⁴Tsîb ge ǁîna tsēa ǀnanus ǀkha gere ǂgaeǂgui, tsî tsuxub hoaba ǀaes di ǃnâb ǀkha.

¹⁵ǁÎb ge ǃgareǀuiga ǃgaroǃhūb ǃnâ ge ǂari kai, tsîb ge ǁîna kai ǁgammi dâus ǀkhas axase ge āsi;

¹⁶tsîb ge ǀuiga xu ǃāroga ge dâu kai, tsîb ge ǁgamga ge dâuǁgôa kai ǃāgu khami.

¹⁷Xawen ge ǁîna ǃaruǀî ǁîb ǃoagu gere ǁore, Hoan xa ǀGapiba ǃgaroǃhūb ǃnâ ra ǁaiǁaiǃâ.

¹⁸Tsîn ge Eloba gere ǃâitsâ ǂgaob ân ǃnâ, ǁîn turab ǃoa ǂûna ra ǂganse.

¹⁹Tsîn ge Elob ǃoagu ǃhoa tsî: Xareb kha Eloba ǃgaroǃhūb ǃnâ tāba ǁāǁā ǁkhā? ti ge mî.

²⁰ǁÎb ge ǀuiba ǂnauo, o gu ge ǁgamga ge dâuǂoaxa, o gu ge ǃāroga ǀoasase ge dâu. Xawe xareb kha pereb ona mā ǁkhā? Xareb kha ǁgan-e ǁaes âba ǂhomiba ǁkhā?

²¹ǁNā-amaga ǃKhūb ge ǁnâuo, ob ge ge ǁaixa; tsî ǀae-i ge Jakob ǃoagu ge ǂhubihe, tsî ǁaib ge Israeli ǃoagu ge khâi,

²²Elob ǃnân ǂgom tama, tsî huib âb ain ge ǂgomaiǂnûi tama hâ i amaga.

²³ǃNubaib ge ǃâude ge mîmā ǀgapise, tsî ǀhommi di dao-amde ge ǁkhowa-am;

²⁴tsîn ge manaba ge ǀapiǂam kaihe, ǂûn nîse, tsîb ge ǁîna ǀhommi ǃhorob xa gere mā.

²⁵Hoan ge ǀhomǃgān di pere-i xa ge ǂû; daob di ǂûnab ge ǀoasase ǁîna gere sîba.

²⁶ǁÎb ge aiǂoas di ǂoaba ǀhomma xu ge ǃgom kai, tsîb ge ǀgaib âb ǀkha ǃkhawagas ǂoaba ge ǂgaeǂguihā.

²⁷Tsîb ge ǁîn ǂamai ǁgan-e ge ǀapi kai tsarab axase, ǁgaboxa anina, hurib amǃgâ ǁgoe ǃhūb khami.

²⁸Tsîb ge ǁîna ǁgoeǃkhais ân ǁaegu ge ǁnāǁnā, omdi ân ǂnamipe.

²⁹ǁGoasin ge ǂû tsî kaise ge ǁâ, tsî turan ge xūnab ge ǁîna ge mā.

³⁰Ganupeb turab âna ǂâu tama hâ tsî ǁîn di ǂûn ganupe ams ân ǃnâ hâ,

³¹hîab ge Elob di ǁaiba ǁîn ǂama ge khâi; hoan ǃnâ ǀgaisagab ge ǃgam, tsî Israeli di ǂkhamkhoegab ge ge ǂnauǁgui.

³²Nēn hoan tawan ge ǃaruǀî gere ǁore; tsî ǂgom tama ge hâ i buruxa dīn âb ǃnâ.

³³ǁNā-amagab ge tsēdi âna ǁausib ǃnâ ge hâtoa kai, tsî kurigu âna ǃhurib ǃnâ.

³⁴ǁÎnab gere ǃgamo, on ge ǁîba dîǃgâ tsî oa, tsî ǃhaese Eloba gere ôa.

³⁵Tsîn ge ge ǂâihō, Elob a ǁîn di ǃgareǀui ǃkhaisa, tsî Elob, Hoan xa ǀGapib a ǁîn di ore-ao ǃkhaisa.

³⁶Tsîn ge ams ân ǀkha ǁîba ǁgoasen tsî nams ân ǀkha ge ǂhumiba bi;

³⁷tsî ǁîn di ǂgaob ge ǁaposase ǁîb ǀkha ge hâ tama hâ i, tsî îǂhôase ǃgaeǀhaos âb tawa hâ tama ge hâ i.

³⁸Xawe ǁîb ge ǀkhomxa tsî ǁoreba ge ǀûba; tsî ǁîna hîkākā tama ge hâ i, tsî ǃnādi kōse ǁaib âba ge ǁkhaebē, tsî ǁgôasib âb hoaragaba ǂkhaiǂkhaikhâi tama ge hâ i.

³⁹Tsîb ge ge ǂâi, ǁîn a ǁgan ǃkhaisa, ǂoa-i, ǃgû-īǀkhā ra-i, tsî ǁkhawa oa tama-i khamin ī ǃkhaisa.

⁴⁰Matikō ǃnāden ǁîba gere ǁaiǁai ǃgaroǃhūb ǃnâ, ǁîba ra tsûtsûǃâ ǃgarob ǃnâ.

⁴¹Tsîn ge ǀasa-ame Eloba gere ǃâitsâ, Israeli di ǃAnuba ra tsûtsûǃâ.

⁴²ǁÎn ge ǂâi tama ge hâ i ǃommi âb xa, ǁnā tsēs, mâǃoasabeba xub ge ǁîna ores xa,

⁴³matib ge saodi âba Egipteb ǃnâ dīsa, tsî buruxan âba Soans di ǃaub ǃnâ.

⁴⁴Matib ge ǃāgu âna ǀaob ǃnâ ǀkharaǀkharasa, ǁgamgu ân xan ā tidega.

⁴⁵ǁÎb ge ǀûitsibena ǁîn ǁaegu ge sî, ǁîna gere nân, tsî ǁgūtsiǁgūben, ǁîna gere hîǀhuruna.

⁴⁶ǁÎb ge ūǀkhīn âna ǂunina ge mā, tsî sîsenni ân di ǂûba ǂhomna.

⁴⁷ǁÎb ge ǂauxûiǂûhain âna ǃnareb ǀkha ge ǃgam, tsî ǁîn di ǀgopehaide ǃkhoab ǀkha.

⁴⁸ǁÎb ge ǁîn di ǀgoana ǃnareba ge māǁnâ, tsî ǁîn di gomana napaga.

⁴⁹ǁÎb ge ǁaib âb di ǀgamsiba ǁîn ǃnâ ge sî, ǁgôasib tsî ǀkhomoǃnâsib tsî ǂōǂōsib tsî ǂguiǃnâgu tsû-ain di sîsabegu tsîna.

⁵⁰ǁÎb ge ǁaib âba daoba ge dība; ǁîn di ǀomsab ge ǁōba xu sâu tama xaweb ge ûib âna ǂhīǁōba ge māǁnâ.

⁵¹Tsîb ge ǂguroǃnaesab hoaba Egipteb ǃnâ ge ǂnau, ǂgurosagu ǀgaib ân diga Xammi di tentomdi ǃnâ.

⁵²Tsîb ge ǁaes âba gūn khami ge ǂgaeǂguiǂui; tsî gū-i khami ǁîna gere ǂgaeǂgui ǃgaroǃhūb ǃnâ.

⁵³Ā, sâusaseb ge ǁîna gere ǂgaeǂgui ǃao taman ge hâ is kōse; xawe khākhoen ân ge hurib xa ge ǃgū-aihe.

⁵⁴Tsîb ge ǁîna ǃanu ǃhūb âb di ǀkharib tawa ge ūsī, ǁnā ǃhommi, amǀkhāb ǃommi âb ge hōbasenni ǃoa.

⁵⁵Tsîb ge ǁîn aiǃâ ǃhaode ge doeǁgaǂui, tsîb ge ǁîb ǃnâ ǀumis ân di ǃâse ǁîna ge amǃnâxa kai; tsîb ge Israeli di ǃhaode tentomdi ân ǃnâ ge ǁan kai.

⁵⁶Xawe ǁîn ge Elob, Hoan xa ǀGapiba ǃâitsâ tsî gere ǁaiǁai; tsîn ge ǁîb di ǃkhō-amde ǃkhōǀgaipe tama ge hâ i.

⁵⁷Tsîn ge ge ǁnāǁgôa, tsîn ge îǂhôaoǃnâ ge i, ǁgûn ân khami; ǁîn ge ge oa, gāxaǃnâ khā-i khami.

⁵⁸Tsîn ge ǁîba ge ǁaiǁai ǀgapigu ân ǀkha; tsîn ge ge ǁgonǁgonǃnâ bi ǁgôatsuiǁgoagu ân ǀkha.

⁵⁹Elob ge ǁnâuo, ob ge ǁaixa tsî Israela hoaragase ge aoxū.

⁶⁰Ob ge Silos tawa hâ tabernakela ge ǁnāxū, ǁnā ommi, ǁanǃkhaiseb ge ǂnûibasen hâ iba khoen ǃnâ.

⁶¹Tsîb ge ǁîb di ǀgaiba ǃkhōsis ǃnâ ge māǁnâ, tsî ǂkhaisib âba khākhoeb di ǃomǁae.

⁶²Tsîb ge ǁaes âba gôaba ge māǁnâ; tsîb ge ǀumis âb ǂama ge ǁaixa.

⁶³ǀAes ge ǂkhamkhoegu âna ge hapu, tsî ǁîn di ǂkhamkhoedi ge karehe tama ge hâ i;

⁶⁴ǁîn di pristergu ge gôab ǃnâ ge ǁnā, tsî ǃoataradi ân ge ā tama ge hā i.

⁶⁵ǃNubaib ge ǃKhūba ǁom hâ khoe-i khami ge ǃnoaǂkhai, ǁē-ao-i, ǂauxûib xa ge dāhe-i khami.

⁶⁶Tsîb ge khākhoen âba ge ǂnaudawa; ǀamo ǃharaxūb ǀkhab ge ǁîna ge ǃharaxū.

⁶⁷Xaweb ge Joseb di tentomsa ge aoxū, tsî Efraimmi di ǃhaosab ge ǃkhōǂuibasen tama ge i;

⁶⁸tsîb ge Judab di ǃhaosa ge ǁhûiǂuibasen, Sionǃhommi hîab ǀnam hâba.

⁶⁹Tsîb ge ǃanusib âba ge om ǀhomǀgapib khami, ǃhūbaib, ǀamoseb ge ǃgaoǃgaob khami.

⁷⁰Tsîb ge ǃgāb âb Daviba ge ǁhûiǂuibasen, tsîb ge gūǃharade xu ge ū bi;

⁷¹daisi ra gūde xub ge ge ūhā bi, Jakobab nî ǃûise, ǁaes âb, tsî Israelǁaes, ǁîb di ǀumisa.

⁷²Tsîb ge ǁîna ǁkhāti gere ǃûi ǂhauǃnâ ǂgaob ǀkha; tsîb ge ǁîna ge ǂgaeǂgui gā-ai ǃommi ǀkha.