Read Khoekhoegowab Psalmdi 79 Bible Online

Psalmdi 79 - Khoekhoegowab bible

Psalmdi 79

¹ǁNaetsanas Asafi dis. Elotse, ǀūben ge sa ǁaes ǃnâ ge hā; tsîn ge sa ǃanu tempela ge ǀuriǀuri, tsîn ge Jerusalemsa ge ǂkhūǂkhū.

²ǁÎn ge sorodi sa ǃgāgu dide ǀhommi di anina ǂûse ge mā, ǁgans sa ǂgomsan disa ǃhūbaib di ǀguruna.

³ǁÎn ge ǀaob âna ǁgam-i axase Jerusalems ǂnamipe gere ǂnâxū, tsî khoe-i ǁîna nî ǁkhō-i xare-i ge ǀkhai ge i.

⁴Sida ǀgūkhoen di ǃharaxūxūse da ge ī, ǃhō tsî ǃkhāǃkhāxūse da ge sida ǂnamipe hâna ge ība.

⁵Mâ ǁaeb kōse, ǃKhūtse? ǀAmosets kha nî ǁaixa? Sa ôasasiba kha ǀae-i axase nî khau?

⁶ǁHōǂui sa ǁgôasiba ǁaedi, satsa ǂan tama hâdi ai, tsî gaosigu, sa ǀonsa ǂgaiǀî tamagu ǂamai;

⁷Jakoban ge hapu, tsî ǀnamǀnamsa ǁanǃkhais âban ge hîǀhuru xuige.

⁸Aibekam dīsādi sida didi xa tā ǂâi re; ǃhaeǃhaesen î ǃgûǃoa da re sa ǀkhomxaǂgaosigu ǀkha, kaise da go ǂkhabu xuige.

⁹Hui da re, sats sida ǃgâiǃōb di Elotse, sa ǀons di ǃgôasib ǃaroma; î ore da î sida ǁorena ǀûba da re, sa ǀons ǃaroma.

¹⁰Tare xū-i ǃaroma di kha ǁaede: Mapab ǁîn di Eloba hâ? ti nî mî. Ab ǂnâxūhe hâ ǀaob sa ǃgāgu dib di ǀkhaoba ǁaedi ǃnâ ǂansa sida di mûdi aiǃâ.

¹¹As ǃkhōsaben di ǃgaesa sa ais aiǃâ sī; ǃnora kai re ǁōb di ôana, sa ǁôab di kaisib ǃoa.

¹²Î sida ǁanǁare-aona hû ǃnādi kōse ǁîn di tîǂams ǃnâ mādawa-am ǁîn di ǃharaxūb, ǁîb ǀkhan sats ǃKhūtsa ge ǃharaxūba.

¹³O da ge sida sa ǁaeda tsî sa ǃû-aib di gūda satsa nîra ǃkhōǀkhā ǀamose, ǃhaosa xu ǃhaos kōse; sa koasa da ge nîra ǃhoa.