Read Khoekhoegowab Psalmdi 80 Bible Online

Psalmdi 80 - Khoekhoegowab bible

Psalmdi 80

¹ǂAm ǁnae-aoba ge dībahes Sosanims ǃoa, ǀhûǀguitimîs ǁnaetsanas Asafi dis. Israelǁîn di ǃûi-aotse, ǁnâu re, Joseb dina gūn khami ra ǂgaeǂguitse; xerugu ǀgapise ǂnôatse, ǂkhaisase ǂhai re.

²Sa ǀgaiba ǂkhaiǂkhaikhâi Efraimmi tsî Benjaminni tsî Manaseb tsîgu di ais aiǃâ, î hā ore da re.

³Elotse, ǁkhawa ūhā da re, î sa aisa ǃnâ kai re, î da sâuhe re.

⁴ǃKhū Elo, ǂnubidi ditse, mâ ǁaeb kōsets kha sa ǁaes di ǀgoredi ǃoagu nî ǁaixa?

⁵Sats ge ǁîna ǁgamron pereb ǀkha ra ǁâǁâ; tsîts ge ǁîna kai ǀgause ǁgamron ǀkha ra āsi.

⁶Sats ge sida ǁanǁare-aona ǂnoaguxūse sida ra ǂnûiba, tsî sida khāhoen ge ǁîǃnābe ra âi.

⁷Elo ǂnubidi ditse, ǁkhawa ūhā da re; î sa aisa ǃnâ kai re, î da sâuhe re.

⁸Sats ge ǂauxûiǂûhaiba Egipteba xu ge ūhā; tsîts ge ǃhaode doeǁgaǂui tsî ǁîba ge ǃhana.

⁹Sats ge ǃkhai-e ge ǁāǁāba bi, tsîts ge ǁîb di ǃnomaga ǃgamse ge ǂgâ kai, ǃhūbab ge ǀoaǀoas kōse.

¹⁰ǃHomgu ge sommi âb xa ge ǁgoe-aihe hâ i, tsî Elob di sederhaide ǂgonagu âb ǀkha.

¹¹ǂGonagu âb ge hurib kōse ge ǀomsī, ǃĀb kōse ǁnâugu âba.

¹²Tarexats kha ǂnubiǂgoagu âba khôaǁnâ hâ, on ǁnā daoba-ū ra ǃgû-īn hoana ra ǃoratoa bi?

¹³Hāgūb ǀgom, haixaǃkhais dib ge ǁîba ra hîǀhuru, tsî ǃaub di ǀgurun ge ǁîba ra ǃûtoa.

¹⁴Elots ǂnubidi ditse, ǁkhawa hā re, î ǀhomma xu kōǁgôa î mû, î nē ǂauxûiǂûhaiba sari re,

¹⁵î sa amǀkhāb ǁôab xa ǂgāhe hâ ǂgonaba sâu, ǁnā ǀgôab, sats kaikaibasen hâba.

¹⁶ǁÎb ge ǀaes ǀkha khauǃkhūhe hâ; ǁîb ge ǁhāǁnâhe hâ, sa ais di ǀausa xun ra kāǁō.

¹⁷Ab sa ǃomma amǀkhāb ǁôab âts di khoeb ǀkha hâ re, khoeb ôab, sats kaikaibasen hâb ǀkha.

¹⁸O da ge satsa xu ǁnāǁgôa tide; ǁkhawa ûi-ûi da re, o da ge sa ǀonsa nîra ǂgaiǀî.

¹⁹ǃKhū Elo ǂnubidi ditse, ǁkhawa ūhā da re, î sa aisa ǃnâ kai re, î da sâuhe re.