Read Khoekhoegowab Psalmdi 83 Bible Online

Psalmdi 83 - Khoekhoegowab bible

Psalmdi 83

¹Ams, ǁnaetsanas Asafi dis. Elotse, tā ǃnō re; tā ǃgome, î tā ǃnōǃari re, Elotse.

²Mû, sa khākhoen ra ǂkhupi, tsî sa ǁkhansaben ge danade ra ǃhâkhâi.

³ǁÎn ge gāxaǃnâsise sa ǁaes ǃoagu ra ǀapeǀape; tsîn ge sâusaben âts ǃoagu ra ǀapeǀhao.

⁴Nētin ra mî: Hā î da ǁîna hîkākā, în ǃaruǀî tā ǁaese ī, în khoena ǃaruǀî Israeli ǀons xa tā ǂâi.

⁵ǂGaob hoaba xun ge ge ǀapeǀhao; sa ǃoagun ge ǃgaeǀhao-e ge dī.

⁶Edommi tsî Ismaelǁîn di tentomdi, Moab tsî Hagarǁîn,

⁷Gebalǁîn tsî Amonǁîn tsî Amalekǁîn, Filisteǁîn tsî Tires ǃnâ ǁan hân tsîn ǀkha.

⁸Asiriaǁîn ge ǁkhāti ǁîn ǀkha ge ǁaeǁaesen; ǁîn ge Loti ôaga ǁôase ge ība. Sela.

⁹Midianni khami ǁîna dī-ū, Siserab khami, Jabinni khami, Kison ǃārob tawa.

¹⁰Endors tawa ge hîkākāhen, ǁîn ge ge ǃhūb di ǀaru kaihe.

¹¹ǁÎn tsî ǁîn di ǀgapiǃgôasagu tsîna Oreb tsî Seeb tsîkhats ge dī khami dī, tsî gaosagu hoagu âna Sebaxi tsî Salmunab tsîkha khami,

¹²ǁnā mî ge gu: A ge sage ǁanǃkhaidi Elob dide ǀumixūse ūǂgā.

¹³Ti Elotse, ǁîna sareb khami ī kai re, ǀhōb ǂoab xa ra ūbēheb khami.

¹⁴ǀAes ǀgomhaixa ǃkhaisa ra khauǃkhūs khami, tsî ǁhabub, ǃhomga ra ǂhubib khami,

¹⁵ǁnās ǁkhās xase ǁîna tūǀnanub âts ǀkha ǃgôaǃgon, î sareb âts ǀkha ǁîna ǃhuri kai.

¹⁶Taob ǀkha ais âna ǀoa kai re, în sa ǀonsa ôa, ǃKhūtse.

¹⁷An tao în ǃhuri ǀamosib kōse; în taob xa dāhe în kā.

¹⁸În ǂan, sats ǀguits, ǀons âts a ǃKhūts ǀguits, Hoan xa ǀGapisa, ǃhūbaib hoaragab ai.