Read Khoekhoegowab Psalmdi 85 Bible Online

Psalmdi 85 - Khoekhoegowab bible

Psalmdi 85

¹ǁNaetsanas Koraxi ôagu dis ǂam ǁnae-aob ge dībahes. Sats ǃKhūts ge sa ǃhūba ǀkhomxase ge ība; Jakob di tsūǀkhābats ge satsa ge dī-unu.

²Sats ge ge ūbē dīsās sa ǁaes disa, sats ge ǁoreb hoab âna ge ǃgū-ai. Sela.

³Sats ge sa ǁgôasib hoaba ge ūbē, sats ge ge unusen sa ǁaib di ǀgamsiba xu.

⁴ǁKhawa sida ǃoa hā re, sats sida ǃgâiǃōb di Elotse, î hîkākā re sida ǂamats ūhâ ǀkhomoǃnâsiba.

⁵ǀAmosib kōsets kha sida ǂama nî ǁaixa? Sa ǁaibats kha ǃhaosa xu ǃhaos kōse nî hâ kai?

⁶ǁKhawats kha ûi-ûi da tide, sa ǁaes nî sa ǃnâ ǃgâiaǂgaoga?

⁷A da mû re, ǃKhūtse, sa ǀkhomxaǂgaosiba, î sa ǃgâiǃōba mā da re.

⁸Tita ge nîra ǃgâ, tare-eb nî Elob ǃKhūba ǃhoa ǃkhaisa; ǁîb ge ǁîb ǁaes tsî ǁîb ǀkhomxaben tsîn ǃoa ǂkhîb xa nîra ǃhoa; xawe an tā ǁkhawa gâresib ǃoa oa.

⁹Amase ǃgâiǃōb âb ge ǀgūse hâba ǁnān ǁîba ra ǃaoǃgâna, ǃgôasib nî sida ǃhūb ǃnâ ǁanga.

¹⁰ǀKhomxaǂgaosib tsî amab tsîkha ge nîra ǃoagu; ǂhanu-aisib tsî ǂkhîb tsîkha ge nîra ǁoagu.

¹¹Amab ge ǃhūba xu nîra ǀkhī, tsî ǂhanu-aisib ge ǀhomma xu nîra kōǁgôa.

¹²ǁKhātib ge ǃKhūba ǃgâiba nîra mā, tsî sida di ǃhūb ge ǂûb âba nîra ūǀkhī.

¹³ǂHanu-aisib ge ǁîb di ais aiǃâ nîra ǃgû, tsî ǁîb ge ǁîn di dāǃharode daob ai nîra unu.