Read Khoekhoegowab Psalmdi 86 Bible Online

Psalmdi 86 - Khoekhoegowab bible

Psalmdi 86

¹ǀGores Davib dis. ǂŌ re ǃKhūtse, sa ǂgaesa, î ǁnâu-am te re, ǀkhomǀkhomsa tsî ǂhâb ǃnâ hâ khoeta xuige.

²Sâu re ti ǀomsa, ǃaoǃgâxa khoeta xuige, sats ti Elotsa, sa ǃgāba ore re, sa ai ra ǂgomaiǂnûiba.

³ǀKhomxa te re, ǃKhūtse, sa ǃoa ta ge hoaraga tsēsa ra ǂgai xuige.

⁴ǃGâiaǂgao kai re ǀoms sa ǃgāb disa, sats ǃKhūtsa ǃoa ta ge ti ǀomsa ra ūkhâi xuige.

⁵Sats ǃKhūts ge a ǃgâi tsî a ǀûbaǀnam, tsîts ge a ǀkhomxaba satsa ra ǂgaiǀîn hoana.

⁶ǃKhūtse, ǁnâu-am re ti ǀgoresa, î ti ǀkhomabasens di dommi ai ǃgaoǃgâ re.

⁷Tsēs ti ǂōǂōsib dis ai ta ge satsa ra ǂgaiǀî, sats ra ǁnâu-am te xui-ao.

⁸Sats ǃKhūts khami īb xareb ge elogu ǃnâ hâ tama hâ; tsî sa sîsengu khami ī sîsengu ge a ǀkhai.

⁹ǃHaodi sats ǃKhūts ge kurudi hoadi ge nîra hā, tsî sa ais aiǃâ nîra ǀgoreǀî, tsî sa ǀonsa nîra ǃgôa.

¹⁰Sats ge a kai xui-ao, tsîts ge buruxana ra dī, sats ǀguits ge a Elo.

¹¹ǁKhāǁkhā te re, ǃKhūtse, sa daoba, tita ge sa amab ǃnâ nîra ǃgû; ǀguiǀgui re ti ǂgaoba, î ta sa ǀonsa ǃao.

¹²Kare tsi ta nî ǃKhū, ti Elotse, ti ǂgaob hoab ǀkha; tsî ta ge sa ǀonsa nî ǃgôa ǀamosib kōse.

¹³ǀKhomxaǂgaosib âts ge ti ǂama a kai xui-ao; tsî sats ge ti ǀomsa ǃgam hâǃkhaib ǁō hân diba xu ge huiǂui.

¹⁴Elotse, ǃguriǂgaoxan ge ti ǃoagu ra khâima, tsî ǀhû hâgu ǁgari-aogu digu ge ti ǀomsa ra ôa, tsî gu ge satsa mûǁae ūhâ tama hâ.

¹⁵Xawe sats ǃKhūts ge ǀkhomxaǂgaoxa tsî ǀkhomxa Elotsa, ǃnūǃnâxa tsîts ge a kai, ǀkhomxaǂgaosib tsî amab tsîkha ǃnâ.

¹⁶ǂNan re tiǀî î ǀkhomxa te re; sa ǃgāba ǀgaib âtsa mā re, î hui re sa ǃgās di ôaba.

¹⁷Tita tawa buruxa sao-e dī re ǃgâiba ǃoa, în ti ǁkhansabena mû în taotaohe, sats ǃKhūts ra mâǃgâ tsî ǁkhaeǂgao te amaga.