Read Khoekhoegowab Psalmdi 89 Bible Online

Psalmdi 89 - Khoekhoegowab bible

Psalmdi 89

¹ǁNaetsanaǂans Etanni Esraǁîb dis. ǀKhomxaǂgaosigu ǃKhūb digu xa ta ge tita ǀamose ra ǁnae ǂgao; tita ge sa amaba ti ams ǀkha ra ǂanǂan ǂgao, ǃhaosa xu ǃhaos kōse.

²Nētits ge mî xui-ao: ǀAmoseb ge ǀkhomxaǂgaosiba ra omkhâihe; ǀhommi aits ge sa amaba ge ǂnûiǁapoǁapo,

³mî raǃâ: Tita ge ǃgaeǀhao-e ge dī ti ǃkhōǂuisabeb ǀkha, tita ge Davib ti ǃgāba ge nūba.

⁴ǀAmosib kōse ta ge sa suriba nîra ǁapoǁapo, tsî sa tronsa ta ge nîra omkhâi ǃhaosa xu ǃhaos ǃoa, ti. Sela.

⁵O gu ge ǀhomga sa buruxana ra ǃkhōǀkhā, ǃKhūtse, ǁkhāti sa amaba ǃanun di ǀhûs ǃnâ.

⁶Tari-e kha ǀhommi ǃnâ ǃKhūb ǀkha a ǀguirohe ǁkhā? Tari-e ǃKhūb khami ī ǀgaisagu di ôagu ǃnâ?

⁷Elob ge kaise a ǃhuriǃhurisa ǃanun di ǀapeǀhaos ǃnâ; tsîb ge a ǃaoǃaosa ǁîb ǂnamipe hân hoan ǃgâ-ai.

⁸ǃKhū Elo ǂnubidi ditse, tari-e sats khami a ǀgaisa, ǃKhūtse, îǂhôasib âts sa ǂnamipe hâtsa?

⁹Sats ge ǁaixasib hurib dib ǂama ra gaosîsen; ǃgabigu âb ga khâio, ots ge satsa ǁîga ra ǃnōǃnō.

¹⁰Sats ge Rahaba ǃgamhe hâ-i axase ge ǂkhūǂkhū; sats ge sa khākhoena sa ǀgaisa ǁôab ǀkha ge ǀgaruǀgaru.

¹¹ǀHommi ge a sa, tsî ǃhūbaib on; ǃhūbaib tsî ǀoasib âb, sats ge ǃgaoǃgaoba.

¹²ǀApas tsî ǃkhawagas tsîrats ge satsa ge kuru; Tabori tsî Hermonni tsîkha ge sa ǀons ǃnâ ra dâ.

¹³Sats ge ǀgaisa ǁôaba ūhâ; ǃommi âts ge a ǀgaisa, sa amǀkhāb ǁôab ge a ǀgapi.

¹⁴ǂHanu-aisib tsî ǂhanub tsîkha ge a sa trons di ǁaposasi; ǀkhomxaǂgaosib tsî amab tsîkha ge ra aimâba tsi.

¹⁵ǃGâiǃōs ge ǁnā ǁaes, dâǀōba a ǂans, ǃKhūtse, sa ais di ǃnâb ǃnâ ra ǃgûsa.

¹⁶ǁÎn ge tsēs hoasa sa ǀons ǃnâ ra dâ; tsî sa ǂhanu-aisiba xun ge ra ǀgapiǀgapihe.

¹⁷Sats ge ǁîn ǀgaib di ǂkhaisitsa xui-ao; tsî sa ǃgâisiba xub ge sida ǁnâba ra ǀgapiǀgapihe.

¹⁸Sida khōsikhōb ge a ǃKhūb di xui-ao, tsî sida gao-aob ge a Israeli ǃAnub di.

¹⁹ǁNātsēts ge satsa ai-i ǃnâ sa ǀnamsabeb ǃoa ǃhoa tsî ge mî: Tita ge huiba ge ǁgui ǁē-aob ai; ǀgui ǂkhamkhoeba ta ge ǁaesa xu ge ūǂuibasen.

²⁰Tita ge Davib, ti ǃgāba ge hō; ti ǃanu ǁnuib ǀkha ta ge ǁîba ge ǂkhauǀkhā.

²¹ǁÎb ǀkhab ge ti ǃomma nîra hâhâ; ǁkhātib ge ti ǁôaba ǁîba nîra ǀgaiǀgaiǃnâ.

²²Khākhoeb ge ǁîba ǁgariǀkhā tide; tsî ǂhanuoǃnâb ge ǁgâiǀā bi tide.

²³Tsî ta ge tita mâǃoasaben âba nîra ǂkhūǂkhū ais âb aiǃâ, tsî ǁkhan bi hâna ta ge nîra ǂnau.

²⁴Tsî ti ǂhauǃnâsib tsî ti ǀkhomxaǂgaosib ge ǁîb ǀkha nîra hâ; tsî ǁnâb âb ge ti ǀons ǃnâ nîra ǀgapiǀgapihe.

²⁵Tsî ta ge ǃommi âba hurib ǂamai nîra ǁgui, tsî amǀkhāb ǁôab âba ǃāgu ai.

²⁶ǁÎb ge: Sats ti Îts, ti Elots tsî ti ǃgâiǃōb di ǃGareǀuits! ti nîra ǂgai te.

²⁷Tsî ta ge ǁîba ǁkhāti ǂguro ǀgôab ase nîra mâi; ǀgapise ǃhūbaib di gao-aogu ǃnâ.

²⁸Tita ge ǀamose ti ǀkhomxaǂgaosiba nîra sâuba bi, tsî ti ǃgaeǀhaosa ǁîba nîra ǃkhōǀgaipeba.

²⁹Tsî ta ge surib âba ǀamose nîra hâ kai, tsî trons âba ǀhommi di tsēdi axase.

³⁰ǁÎb di ôagu ga ti ǂhanuba ǁnāxū, tsî ti ǂhanugu ǃnâ ǃgû tama io,

³¹ǁîgu ga ti ǂnûiǂgāde ǀuriǀuri, tsî ti mîmāde ǃkhōǀgaipe tama io,

³²o ta ge ǃûǂams âga hai-i ǀkha nîra ǁkhara, tsî ǂhanuoǃnâsib âga tsûtsû-aidi ǀkha.

³³Xawe ti ǀkhomxaǂgaosiba ta ge ǁîba xu ūbē tide; tsî ti îǂhôasib ge ǁkhuihe tide.

³⁴Tita ge ti ǃgaeǀhaosa ǀuriǀuri tide, tsî ti amǁgaukha xu ge ǀkhīna ta ge ǀkharaǀkhara tide.

³⁵Tita ge ǀgui ǃnā-e ti ǃanusib tawa ge nū: Tita ge Daviba ǂhumiba tide! ti.

³⁶ǁÎb di surib ge ǀamosib kōse nîra hâ, tsî trons âba sores khami ti aiǃâ;

³⁷ǁîb ge ǀamose nîra ǁapoǁapohe, ǁkhâb khami, tsî ǀhommi ǃnâ hâ ǃkhō-amaob ge a ǂgomǂgomsa. Sela.

³⁸Xawets ge ǂhāxu tsî ge aoxū bi, tsîts ge ǂkhauǀkhāsabeb âts ǃoagu ge ǁaixa.

³⁹Sats ge ǃgāb âts di ǃgaeǀhaosa ge ǁaudī, sats ge krons âba ǃhūb ai ge ǀuriǀuri.

⁴⁰Sats ge ǁîb di ǂnubiǂgoagu hoaga ge khaoǃkhopa, sats ge ǁîb di ǁaposa hâǃkhaide ge khôaǂkhūǂkhū.

⁴¹ǁÎba ra ǃgû-īǀkhān hoan ge ǁîba ge ǃnariǀhana; ǁîb di ǀgūkhoenab ge ǃharaxūxūse ge ība.

⁴²Sats ge amǀkhāb ǁôab ǁîb mâǃoasaben diba ge ǀgapiǀgapi; sats ge ǁîb di khākhoen hoana ge ǃgâiaǂgao kai.

⁴³Sats ge ǁkhāti gôab âb di ǀā ǀkhāba ge dawaǃkhuni, tsîts ge ǃkhams ǃnâ mâhō kai bi tama ge hâ i.

⁴⁴Sats ge ǁîba îsasib âba ge ūǀhana, tsî sats ge trons âba ǃhūb ai ge aoǁgui.

⁴⁵Sats ge ǂkhamsis âb di tsēde ge ǃnubuǃnubu; sats ge ǁîba taob ǀkha ge ana. Sela.

⁴⁶Mâ ǁaeb kōsets kha ǃKhūtse, hugaǀgui nî gaugausen tsîb sa ǁgôasiba ǀae-i khami nî khau?

⁴⁷ǂÂi re, matikōseb a ǃnubu ti ûibasa. Tare xū-i ǃaromats kha khoen ôan hoana ǁause kuru hâ?

⁴⁸Mâ khoeǃnôaba ûi hâ tsî ǁōba mû tideba, ǀoms âba ǀhobas di ǀgaiba xu a ǃnoraǃnora ǁkhāba? Sela.

⁴⁹ǃKhūtse, mapa gu kha sa aibekam ǀkhomxaǂgaosiga hâ, Davibats ge ǂgomǂgomsasib âts ǃnâ nūbaga?

⁵⁰ǂÂi re, ǃKhūtse, sa ǃgāgu di ǃharaxūhes xa, ti tîǂams ǃnâ ta ra tani ǀgausa, ǃharaxūs ǁaedi hoadi disa,

⁵¹ǁîs ǀkhan ge sa khākhoena ǃharaxūsa, ǃKhūtse, ǁîs ǀkhan ge sa ǂkhauǀkhāsabeb di dāǃharode ǃhōsa.

⁵²Ab ǃKhūba koahe re ǀamosib kōse! Amen, Amen.