Read Khoekhoegowab Psalmdi 90 Bible Online

Psalmdi 90 - Khoekhoegowab bible

Psalmdi 90

¹ǀGores Moseb, Elob aob dis. ǃKhūtse, sats ge ǁhaiǁhâǃkhaise ge ība da, ǃhaosa xu ǃhaos kōse.

²ǃHomgu ǃnae tama hâ tsî ǃhūb tsî ǃhūbaib tsîkhats ūǀkhī tama hâ hîa, ā, ǀamosiba xu ǀamosib kōsets ge satsa a Elo,

³Sats khoeba ǁkhawa ra tsara kaits tsî ra mîtsa: ǁKhawa oa, khoen ôado, ti.

⁴ǀOadisi kurigu ge sa mûǁae ǁarikam tsēs ǃgû-ī gos khami ī xui-ao, tsî tsuxuǃûiǁaeb khami.

⁵Sats ge ǁîna ra dâubē kai, ǁîn ge ǂoms khami ī; ǃnauǁgoagan ge ǀgâb khami ī hîa ra ǁhaoba.

⁶ǁGoas aib ra ǃam tsî ra ǁhao, ǃuiab ra ǃgaoǁnâhe tsî ra ǂnâ.

⁷Sida ge ra kāǁō sa ǁaiba xu xui-ao, tsî sa ǁgôasiba xu da ra ǃhuriǃhurihe.

⁸Sats ge sida dīsāde sa aiǃâ ra ǂnûi, sida ǂganǃgâsa ǁorena sa ais di ǃnâb ǃnâ.

⁹Sida tsēdi hoadi ge sa ǁaiba xu ra ǃgû-ī; sida kuriga da ge ǂâi-i khami ra hâǀamǀam.

¹⁰Sida ûiǁaeb ge hûdisi kuriga, tsî khoe-i ga kaise ǀgaisao, ǁkhaisadisi kuriga; tsî dana xūkha âb ge ǀhupub tsî ǃoab tsîkha; ǃhaeseb ra ǃgû-ī, ǁkhanagaru-i khami da ī amaga.

¹¹Tari-e a ǂan sa ǁaib di ǀgaib tsî sa ǁgôasib di ǀgaiba satsa ǃaosa ǃoa?

¹²A da ǁnâi sida di tsēde ǃgôaǁkhāpesen, î da gā-ai ǂgaoba hō re.

¹³ǁKhawa oahā re, ǃKhūtse, mâ ǁaeb kōsets nî ǀhawe? Î ǀkhomxa re sa ǃgāga.

¹⁴ǁÂǁâ da re ǁgoaǁaeb ai ǀkhomxaǂgaosib âts ǀkha, î da dâ tsî ǃgâiaǂgao re sida di ûitsēdi hoade.

¹⁵ǃGâiaǂgao kai da re, ǁnā tsēdi hîats ge ǁîdi ǃnâ ǁgâiǀā da di, ǁnā kurigu hîa da ǁîgu ǃnâ ǂkhababa ge mûgu khaoǃgâ.

¹⁶Ab sa sîsenna mûhe re sa ǃgāgu xa, tsî sa ǂkhaisiba ǁîgu di ôan ai.

¹⁷Tsî ǀnamǀnamsasib ǃKhūb sida Elob diba ab sida ǀkha hâ re; îts sida ǃomgu di sîsenna ǁapoǁapoba da re, ā, ǁapoǁapo re sida ǃomgu di sîsenna.