Read Khoekhoegowab Psalmdi 91 Bible Online

Psalmdi 91 - Khoekhoegowab bible

Psalmdi 91

¹Sâuǃkhais Hoan xa ǀGapib dis ǃnâ ǂnôa-i, ǁnā-i ge Hoaǀgaixab di sommi ǃnâ ra hâǁgoa-e.

²ǁNā-i ge ǃKhūb ǃoa ra mî: Ti ǁhaiǁhâts, ti ǁaposa hâǃkhaits, ti Elots, ǁîts ai ta ra mûmâinǃgâts.

³ǁÎb ge satsa aniǃkhō-aob di ǁnoaba xu ra ore xui-ao, kaise ǁgaoǁgaosa ǂhīǁōba xu.

⁴ǁÎb ge satsa ǁgabokha âb ǀkha ra ǃgū-ai, tsî ǁgabokha âb ǃnâts ge a sâusen ǁkhā; ǁîb di amab ge a khōsikhō tsî a sâuǃkhai.

⁵Sats ge ǃao tide ǃhurib tsuxub dib xa, ǂāb tsēa ra ǁkhâuheb xa,

⁶ǂhīǁōb ǃkhaeb ǃnâ ra ǃgûmab xa, ǁgaoǁgaosib tsēǃgâǁaeb ai ra hîǀhurub xa.

⁷Sa xōǀkhān ga ǀoadisina a ǁnā, tsî disiǀoadisina sa amǀkhāb ai, xawe i ge sa ǀgūse ǀkhī tide.

⁸Mûs ǀguisats ge nî hî sa mûra ǀkha, tsîts ge mādawa-ams eloxoresan disa nîra mû.

⁹Sats ǃKhūts ge a ti ǁhaiǁhâǃkhai xui-ao. Hoan xa ǀGapibats ge sa sâuǃkhaise ge dībasen,

¹⁰ots ge tsū xū-i xare-i xa hāǂamhe tide, tsî tsûtsû-ai-i xare-i ge sa omsa ǀgūǀgūsen tide.

¹¹ǁÎb ge ǀhomǃgāgu âba sats ǃaroma nîra mîmā xui-ao, sa daogu hoagu ai gu nî ǃûi tsi ǃkhaisa;

¹²o gu ge ǃomgu ai nîra tani tsi, ǂais âtsats ǀui-i tawa ǃnom tidega.

¹³Ots ge xammi tsî ǃgais tsîra ai nîra dā, ots ge ǂkham xammi tsî ǀaob tsîkha nîra dāǂkhū.

¹⁴Kaiseb a ǀnam te, tib ra Eloba mî, amaga ta ge nîra huiǂui bi; tita ge nîra sâu bi, ti ǀonsab a ǂan amaga.

¹⁵ǁÎb ga ǂgaiǀî te, o ta ge nî ǁnâu-am bi. Tita ge ǁîb ǀkha nîra hâ ǂōǂōsib ǃnâ; Tita ge ǁîba huiǂui tsî ǃgôasiba nîra mā.

¹⁶Tita ge ǁîba ǂomxa ûib ǀkha nîra ǁâǁâ, tsî ta ge ǁîba ti ǃgâiǃōba nîra mû kai.