Read Khoekhoegowab Psalmdi 92 Bible Online

Psalmdi 92 - Khoekhoegowab bible

Psalmdi 92

¹ǁNaetsanas, ams sâtsēs dis. ǃGâi i ge a ǃKhūba karesa, tsî ǀons âtsa psalmǁnaebasa, Hoan xa ǀGapitse,

²ǁgoas ai sa ǀkhomxaǂgaosiba aoǁnâsa, tsî tsuxugu ǃnâ sa îǂhôasiba,

³disiǁapaxa ǀkhōxūs ai tsî harps ai, siters di ǁkhoaxa ǀōgu ǀkha.

⁴Sats ge tita ge ǃgâiaǂgao kai, ǃKhūtse, sa dīgu ǀkha; tita ge nîra dâ sa ǃomkha di sîsengu ǃaroma.

⁵ǃKhūtse, matikōse gu a kai sa sîsenga, kaise di a ǃgam sa ǂâide!

⁶ǁNâuǃāoǃnâ khoe-i ge ǁîsa ǂan tama, tsî gâre khoe-i ge nēsa ǁnâuǃā tama hâ,

⁷eloxoresan ra ǁhaon khami ǀomkhâi ǃkhaisa, tsî ǂkhabadī-aon hoan ra ǀom ǃkhaisa, nēsa ǀamosib kōsen nî hîkākāhese.

⁸Xawe sats ge a ǀgapi ǃKhūtse, ǀamosib kōse.

⁹Kō, sa khākhoena, ǃKhūtse, kō, sa khākhoen ge nîra kāǁō; ǂkhabadī-aon hoan ge nîra ǀgaruǀgaruhe.

¹⁰Xawe sats ge ti ǁnâba nîra ǀgapiǀgapi ǃgarogomab dib khami; ǀasa ǁnuib ǀkha ta ǂnâǂamhe hâ.

¹¹Tsî ti mûs ge ti ǃkhē-aona nîra kōǀî; ti ǂgaera ge nîra ǁnâu ǂkhabadī-aon tita ǃoagu ra khâin xa.

¹²ǂHanu-ai-i ge palmhai-i khami nîra ǀomkhâi, ǁî-i ge Libanonni di sederhai-i axase nîra ī;

¹³ǃKhūb ommi ǃnâ ǂgāhe hân, ǁîn ge ai-omgu sida Elob digu ǃnâ nîra ǀomkhâi.

¹⁴Kairasib xaweb ǃnân ge ra ǂûtani, kausa tsîn ge a ǃam,

¹⁵aoǁnân nîga, ǃKhūb a ǃgâi ǃkhaisa; ǁîb ge a ti ǃgareǀui, ǂkhaba-i xare-i ge ǁîb ǃnâ hâ tama hâ.