Read Khoekhoegowab Psalmdi 94 Bible Online

Psalmdi 94 - Khoekhoegowab bible

Psalmdi 94

¹ǀKhaogu di Elotse, ǃKhūtse, ǀkhaogu di Elotse, ǂkhaisase ǂhai re.

²Khâi re, ǃhūbaib di ǂhanuǂhanu-aotse; mādawa-am re ǃguriǂgaoxana dīgu âna.

³Matikōsen kha, ǃKhūtse, matikōsen kha eloxoresana nî dâ?

⁴ǁÎn mîǁgaiǁgai tsî ǃgarise ra ǃhoa, ǂkhabadī-aon hoan ra koasen.

⁵ǃKhūtse, sa ǁaesan ra ǂkhūǂkhū; tsî sa ǀumisan ra ǁgâiǀā.

⁶ǃOataradi tsî ǃhaokhoen tsînan ra ǃgam; tsî ǃoaǀgôanan ra hîkākā.

⁷Tsîn ra mî: ǃKhūb ge mû tama hâ; Jakob di Elob ge ǂan tama hâ.

⁸ǁNâuǃā re, sa ǁnâuǃāoǃnâdu ǁaes dido; tsî sa gâredo, mâ ǁae du kha nî gā-ai?

⁹ǁÎb ǂgaesa ge ǂgāba ǁnâi ǁnâub tide? ǁÎb mûsa ge kuruba ǁnâi mûb tide?

¹⁰ǁÎb ǃhaode ra ǁkharaba, ǁnâi ǁkharab tide, ǁîb khoeba ǂansa ra ǁkhāǁkhāba?

¹¹ǃKhūb ge ǂâidi khoen dide a ǂan, ǁîdi a ǁau ǃkhaisa.

¹²ǃGâiǃōb ge hâ, ǃKhūtse, ǁnā khoeb, sats ra ǁgauǃnâba, sats ra ǂhanub âtsa ǁkhāǁkhāba;

¹³sâ kai bits nîga ǂkhaba tsēdi ǃnâ, eloxoresab nî āba khaobahes kōse.

¹⁴ǃKhūb ge ǁaes âba ǂhara tide xui-ao, tsîb ge ǀumis âba ǁnāxū tide.

¹⁵ǀGoraǃgâs ge ǂhanu-aisib ǃoa nîra oa xui-ao, tsî ǂhauǂgaoxan hoan ge nēsa nîra sao.

¹⁶Tari-e nî mâǃgâ te ǂkhabadī-aon ǃoa-ai? Tari-e nî khâiba te dīsā-aon ǃoagu?

¹⁷ǃKhūb ga huise ība te tama hâ io, os ga ti ǀomsa ǃhaese ǃnōsasib ǃnâ ǁan hâ.

¹⁸ǂÂi ta geo: Ti ǂais ra ǁnope ti, ǃnubaib ge sa ǀkhomxaǂgaosiba ge ǂkhâǃnâ te, ǃKhūtse.

¹⁹Ti ǂâidi ge ti ǃnâ ǂguio, o di ge sa ǁkhaeǂgaode ti ǀomsa ge khoakhoa.

²⁰ǀGoraǃgâǃnaos ǂkhabasigu disa, sats ǀkha ǀguis nî, ǁîs ǂnûiǂgās di amǃnâs ǃnâ ǀhupuba ra ūǀkhīsa?

²¹ǁÎn ge ǀoms ǂhanu-ai-i dis ǃoagu ra ǃgaeǀhao, tsî ǀhapio ǀaoba ra ǀâxarexū.

²²Xawe ǃKhūb ge ǀgaisa hâǃkhaise ge ība te, tsî ti Eloba ti ǁhaiǁhâs di ǃgareǀuise.

²³ǁÎb ge ǁîna ǂhanuoǃnâsib âna nîra mādawa-am, tsîb ge ǁîna ǂkhabasib ân ǂama nîra hîkākā; ǃKhūb sida Elob ge ǁîna nîra hîǀhuru.