Read Khoekhoegowab Psalmdi 95 Bible Online

Psalmdi 95 - Khoekhoegowab bible

Psalmdi 95

¹Hā î da ǃKhūba ǃgâiaǂgaoxase ǁnaeba; î da sada ǃgâiǃōb di ǃgareǀuiba dâba.

²Î da ais âba koas ǀkha ǃgûǃoa, î da ǁnaetsanadi ǀkha ǁîba dâba.

³ǃKhūb ge a kai Elo xuige, ā, kai Gao-aob ge a ǁî, elogu hoagu ǂamai.

⁴ǁÎb ǃommi ǃnâ di ge ǃhūbaib di ǃgam ǃkhaide hâ, tsî ǃhomgu di ǀgapigu ge a ǁîb di.

⁵ǁÎb dib ge ǁkhāti huriba, ǁîb ge dī bi amaga, tsî ǁîb di ǃomkha ge ǂnâsa ǃhūba ge kuru.

⁶Hā î da ǀgoreǀî, î da ǁnāǁgoe, î da ǃhonǁgoa ǃKhūb sada ge kurub aiǃâ;

⁷ǁÎb ge a sada di Elo, tsî sada ge a ǁîb ǃû-ais di ǁae, tsî ǃommi âb di gū xuige. Nētsē du ga koma dommi âba a ǁnâu ǂgaoxa!

⁸Sadu ǂgaoba tā karokaro, Meribas tawan ge dī khami, Masas di tsēs ai i ge ī khami, ǃgaroǃhūb ǃnâ;

⁹ǁnāpa gu ge sadu îga tita ge ǃâitsâ, ǁîgu ge tita gere ǃâi, ti sîsenna gu ge mû xawe.

¹⁰Hakadisi kurigu kōse ta ge ge ǃoa kaihe nē ǃhaos xa; o ta ge ge mî: ǁÎn ge khoen ǁhapu ra ǂgaogu â-in, ti daoga ǂan tama hâna.

¹¹ǁNā-amaga ta ge ti ǁaib ǃnâ ge nū: Ti sâb ǃnân ǂgâ tide, ti.