Read Khoekhoegowab Psalmdi 97 Bible Online

Psalmdi 97 - Khoekhoegowab bible

Psalmdi 97

¹ǃKhūb ra gaosîsen, ab ǃhūbaiba dâ re; îb ǃnāǃnuidi di ǂguiba ǃgâiaǂgao re.

²ǁÎb ǂnamipen ge ǃâudi tsî ǃkhaenab tsîna hâ; ǂhanu-aisib tsî ǂhanub tsîkha ge a trons âb di ǃgaoǃgao.

³ǀAes ge ǁîba ra aimâba tsîs ge mâǃoasaben âba ǁîb ǂnamipe ra ǂhubi.

⁴ǁÎb di napagu ge ǃhūbaiba ra ǃnâǃnâ; ǃhūbaib ǁîsa mû tsî ra ǀkhū.

⁵ǃHomgu ge ra tsuni ǂnuruǁnui-i khami ǃKhūb di ais aiǃâ, ǃKhūb ǃhūbaib hoaragab dib di ais aiǃâ.

⁶ǀHomgu ge ǁîb di ǂhanu-aisiba ra aoǁnâ, tsî ǁaedi hoadi ge ǂkhaisib âba ra mû.

⁷Taotaohen nîra hoan, īga ra ǃoaban, ǁgôa-elogu xa ra koasenna, ǁîb aiǃâ gu ge elogu hoaga ra ǃhonǁgoa.

⁸Sions ge ǁîsa ǁnâu tsî ra ǃgâiaǂgao, tsî ǀgôadi Judab didi ge ra ǃgâiaǂgao sa ǀgoraǃgâdi ǃaroma, ǃKhūtse.

⁹Sats ǃKhūts ge a Hoan xa ǀGapi ǃhūbaib hoaragab ai xui-ao; sats ge kaise a ǀgapi elogu hoagu ǃgâ-ai.

¹⁰ǃKhūba ǀnam hâdo, ǁkhan re ǂkhababa. ǁÎb ge ǁîb ǀnamsaben di ǀomde ra sâu, ǁîb ge eloxoresan di ǃomǁaeba xu ǁîna ra ore.

¹¹ǃNâb ge ǂhanu-ai-i ǃaroma ra tsorohe, tsî ǃgâiaǂgaoba ǂhauǃnâ-i ǃaroma.

¹²ǂHanu-aido, ǃgâiaǂgao du re ǃKhūb ǃnâ, î gangan ǁîb ǃanu ǀonsa.