Read Khoekhoegowab ǂKhoamîdi 1 Bible Online

ǂKhoamîdi 1 - Khoekhoegowab bible

ǂKhoamîdi 1

¹ǂKhoamîdi Salomob, Davib ôab Israeli gao-aob didi ge nēde.

²Gā-aisib tsî ǂgōǀaus tsîra nî ǂanhega; ǁnâuǃāb di mîdi nî ǁnâuǃāhese,

³ǂgōǀaus ǃgâi ǁnâuǃāb tsî ǂhanu-aisib tsî ǂhanub tsî ǂhauǃnâsib tsîgu dis nî ǃkhōǃoahega;

⁴gâredu nî gā-aisiba māhega, ǂkhamkhoeba ǂans tsî ǂanǃgâsenxasib tsîra.

⁵Gā-ai-e a-i ǁnâu, î-i ǃaruǀî ǁkhāǁkhāsa ǀaro tsî ǁnâuǃāxa-e a-i gā-ai ǀapesa hō,

⁶î-i ǁnâuǃā ǂkhoamîs tsî ǁguiǃās tsîra, gā-ain di mîdi tsî ǁîn di ǀhae-aidi tsîna.

⁷ǃAoǃgâb ǃKhūb dib ge ǂans di tsoatsoaba, gâren ge gā-aisib tsî ǂgōǀaus tsîra ra ǃharaxū.

⁸ǁNâu re ti ôatse, saob di ǂgōǀausa, îts saos di ǁkhāǁkhāsa tā ǂkhā.

⁹ǁÎra ge sa danasa ǃgâi anixūse nî ība, tsî ǃaob âtsa karab ase.

¹⁰Ti ôa, ǁore-aon ga nana tsio, tā māsen.

¹¹ǁÎn ga mîo: ǃGûǀkhā da, î da ǀaoba ǃâuǁgoe, î da ǀhapioba gaugausen hâse ǃâuǁgoe ǃaroma-i ose;

¹²î da ǁîna ûitsamase hara ǀhobas khami, ā, ǂhauǃnân āb ǃnâ ra ǁgôan khami;

¹³î da ǃgomǀgausa xūn hoana hō, î da sida omde ǁkhâuǁnâxūn ǀkha ǀoaǀoa;

¹⁴îts ǁnâi sida ǀkha amǃnâxa re, î da hoatsama ǀgui mariǁhōs ǀguisa ūhâ.

¹⁵Ti ôa, tā ǁîn ǀkha daob ai ǃgû, ǂkhā sa ǂaisa ǁîn di daoba xu;

¹⁶ǁîn di ǂaidi ge ǂkhababǀî ra ǃkhoe xuige, tsîn ge ǀaoǂnâxūsa a ǃhaeba.

¹⁷Amases ra ǀûisa ǁause mâ aniǃnôa-i hoa-i di ais aiǃâ ǃāhe?

¹⁸Tsîn kom nēna ǁîn di ǀaob ǂhaniba ra ǃapio tsî ǁîn di ǀomdi ǂûde ra gaugausenbao.

¹⁹Nēti gu ge ī daogu mâ-i hoa-i xūǃgunuxasiba ra sîsenū-i diga; ǁîb ra ǀhonkhoeb âb di ûiba ǃkhō.

²⁰Gā-aisib ra ǃgarise ǃauga ǃau, daogu aib ra dommi âba ǁnâu kai;

²¹ǂKhupixa ǃkhaidi tawab ra ǂgai, ǁāgu di daodi tawab ra mîdi âba ǃhoa:

²²Gâredo, matikōse du kha ǁnâi gâresiba nî ǃkhōǀgai tsî ǃhō-aona ǃhōsa nî tura tsî gârena ǂansa nî ǁkhan?

²³Oa du re ti ǂgōǀgausǀî, mû, tita ge ti Gagaba ǃnāǂamsase sadu ǂama nî ǁhōǂui, ti mîde ta ge nî ǂanǂan du.

²⁴ǂGai ta ge xawe du ge ge ǂkhā amaga, ti ǃomma ta ge ǀhōǂui, xawe khoe-i hîa ra ǃgaoǃgâ-i ge a ǀkhai amaga.

²⁵Tsî ti ǀapes hoasa du ge aoxū, tsî ti ǂgōǀausa du ge ǂkhā amaga,

²⁶ǁnā-amaga ta ge ǁkhāti sadu di tsūǃōb ǃnâ nîra âi, ǁnā-amaga ta ge nîra ǃhō, sadu di ǃhurib ga hāo,

²⁷hîǀhurus aseb ga sadu di ǃhuriba hāo, sadu di tsūǃōb ga sare-i xase hāo, ǂōǂōsib tsî ǀhūb tsîkha xa du ga hāǂamheo.

²⁸ǃNubain ge tita nîra ǂgaiǀî, xawe tita ge ǃeream tide, ǃnauǁgoagan ge tita nîra ôa, xawen ge hō te tide.

²⁹ǁÎn ge ǂansa ǁkhan amaga, tsî ǃaoǃgâb ǃKhūb diban ge ǁhûiǂuibasen tama i amaga,

³⁰ǁîn ge ti ǀapes ǀkha ǀgui tama i, ti ǂgōǀaudi hoaden ge ǃharaxū,

³¹amagan ge ǂûb ǁîn daob dib xa nîra ǂû tsî ǀapeǀape-aidi ân xa nîra ǁâ.

³²Gâren ra ǂkhā ǃkhais ge ǁîna nîra ǃgam, tsî ǃgâiǃgâb gâren dib ge ǁîna nîra hîkākā xui-ao;

³³xawe tita ga ǁnâu-i, ǁnā-i ge sâusase nîra ǁan, tsî i ge ǂkhabab di ǃaob ǃnâ nîra ǂkhî.